Dris Mertens: "Karyeramı bitirmək istəsəm də, "Qalatasaray"dan ayrılmaq istəmirəm"

"Qalatasaray" klubunun belçikalı ulduzu Dris Mertens mövsüm başa çatdıqdan sonra hansı qərarı qəbul edəcəyini bilmədiyini deyib.

Oxu.Az "SporX"ə istinadən xəbər verir ki, futbolçu karyerasını bitirmək istədiyini, lakin "Qalatasaray"dan ayrılmaq istəmədiyini bildirib.

"Hazırda nə edəcəyimi bilmirəm. Karyeramı bitirmək istədiyimi dəfələrlə dilə gətirmişəm, amma, "Qalatasaray" elə bir klubdur ki, buradan ayrılmaq çətindir. Futbolçu karyeram bitdikdən sonra etmək istədiyim çox şey var. Artıq ailəmlə daha çox zaman keçirmək və oğlumla həyatın dadını çıxarmaq barədə düşünürəm", - deyə D.Mertens bildirib.

Qeyd edək ki, Dris Mertens "Qalatasaray" forması ilə meydana çıxdığı üç mövsümdə ümumilikdə 134 oyunda komandasına kömək edib, 24 qol və 44 məhsuldar ötürmə ilə yadda qalıb.