"Real Madrid"in baş məşqçisi Joze Mourinyo UEFA Çempionlar Liqasının III turunda "Leypziq"lə keçiriləcək oyun öncəsi Arda Güler və Bernardo Silvanın ehtiyatda qalmasına aydınlıq gətirib.
Oxu.Az xəbər verir ki, portuqaliyalı mütəxəssis mətbuat konfransında futbolçuların fərqli mövqelərdə oynamaq imkanlarından və komanda balansının qorunmasının vacibliyindən danışıb.
"Onlar üçün ən yaxşısı meydanda olmaqdır. Hər ikisi fərqli oyunçudur və fərqli təcrübəyə malikdir. Çoxşaxəli olmaq və müxtəlif mövqelərə uyğunlaşmaq bacarıqları var. Elə futbolçular da var ki, təbii mövqelərində oynamasalar, ümumiyyətlə, meydana çıxmırlar. Bu, seçim məsələsi deyil.
Ötən oyunda fərqli yarımmüdafiə xətti ilə çıxış etdik. Onlardan biri daha çox mövqeyini qoruyan, digəri isə yaradıcı oyunçu idi. Hər şey vəziyyətdən asılıdır. Komandada balansı və keyfiyyəti təmin etmək üçün mümkün olan ən yaxşı kombinasiyanı tapmağa çalışıram.
"Roma" ilə oyunda Bernardo və Arda ilə başlasaydıq, bizə beş qol vurardılar. Çünki belə bir oyuna tab gətirmək gücündə deyildik. Bəzən verdiyim qərarların düzgün olduğu ortaya çıxır", - deyə Mourinyo bildirib.
Xatırladaq ki, UEFA Çempionlar Liqasının III turunda "Real Madrid" klubu sabah öz meydanında "Leypziq" klubunu qəbul edəcək. Qarşılaşma Bakı vaxtı ilə saat 23:00-da start götürəcək.
