Minifutbol üzrə Avropa çempionu olan Azərbaycan millisinin üzvü Ramiz Çovdarov qazanılan uğuru azarkeşlərin dəstəyi ilə əlaqələndirib.
Oxu.Az xəbər verir ki, o, Slovakiyada keçirilən Avropa çempionatından sonra Heydər Əliyev Beynəlxalq Aeroportunda təşkil olunan qarşılanma mərasimində jurnalistlərə açıqlamasında bildirib ki, komanda bütün turnir ərzində azarkeşlərin dəstəyini hiss edib.
"Şükürlər olsun ki, ikinci dəfə Avropa çempionu olduq. İstər Slovakiyada tribunadan bizi dəstəkləyən, istərsə də uzaqdan ürəyi bizimlə döyünən azarkeşlərimiz bu yolda bizə ən böyük gücü verdilər. Onların dəstəyi sayəsində uğura nail olduq. Bu qələbəni xalqımıza, bizi sevən hər kəsə həsr edirik", - deyə o qeyd edib.
Ramiz Çovdarov yarımfinal mərhələsində yerinə yetirdiyi penalti zərbəsindən də danışıb.
"Belə məsuliyyətli anlarla daha əvvəl də qarşılaşmışam və müəyyən təcrübəyə malikəm. Buna görə də topu götürərək zərbəni özüm yerinə yetirmək qərarına gəldim. Məsuliyyəti üzərimə götürdüm və şükürlər olsun ki, komandanın növbəti mərhələyə yüksəlməsinə töhfə verə bildim", - deyə milli üzvü vurğulayıb.
O, həmçinin rəqiblərin Azərbaycan yığmasına qarşı xüsusi motivasiya ilə mübarizə apardığını bildirib:
"Rəqiblərin bizə qarşı aqressiv və motivasiyalı oynaması gözlənilən idi. Çünki Azərbaycan hazırkı dünya çempionudur və bütün komandalar bizi yaxşı tanıyır. Hər kəs Azərbaycanı məğlub etməklə çempionluq yolunda mühüm addım atmaq istəyirdi. Lakin buna nail ola bilmədilər. Biz ikinci dəfə Avropa çempionu olduq. Bir daha bizi dəstəkləyən, duaları ilə yanımızda olan hər kəsə təşəkkürümü bildirirəm".
