"Twitter"in qurucusu yeni platforma ilə qayıtdı

"Twitter"in (hazırda "X" kimi tanınır) qurucusu Cek Dorsi böyük dil modelləri ilə işləməyi və süni intellekt agentlərinin yaradılmasını asanlaşdırmaq üçün nəzərdə tutulmuş innovativ "Goose" platformasını təqdim edib.

Oxu.Az-ın "Kommersant"a istinadən verdiyi məlumata görə, servis biznesmenə məxsus "Block" şirkəti tərəfindən hazırlanıb.

Bildirilib ki, "Goose" platforması proqram mühəndisliyi sahəsində tapşırıqların avtomatlaşdırılması üçün açıq və pulsuz mühit təqdim edir.

"Goose" sayəsində tərtibatçılar kodu bir proqramlaşdırma dilindən digərinə asanlıqla köçürə, API yarada, verilənlər bazasının monitorinqi və optimallaşdırılmasını qura, həmçinin məhsuldarlıq testlərini apara biləcəklər. Platforma, eyni zamanda, bir neçə tətbiq və ya sistemlə işləməyə imkan verir ki, bu da iş effektivliyini əhəmiyyətli dərəcədə artırır.

"Apache 2.0" lisenziyası altında əlçatan olan "Goose"un modul strukturu xidməti mövcud sistemlərə inteqrasiya etməyə və onu xüsusi tapşırıqlara uyğunlaşdırmağa imkan verir.

Şirkət hesab edir ki, "Goose" mühəndisləri gündəlik tapşırıqlardan azad edəcək.