Dünya miqyasında da İslam kapital bazarının potensialı artır.
Oxu.Az xəbər verir ki, bunu Azərbaycan Respublikası maliyyə nazirinin birinci müavini Anar Kərimov 2-ci Azərbaycan Halal Biznes (AZHAB) Forumunda "İnkişaf etməkdə olan bazarlarda islam maliyyəsi üçün rəqabətli mühitin yaradılması: Müxtəlif regionlardan təcrübələr və öyrənilmiş dərslər" mövzusunda aparılan panel müzakirəsi zamanı deyib.
O bildirib ki, təkcə keçən il sukuk (islam istiqrazları) buraxılışının həcmi 180 milyard dolları ötüb: "Bununla yanaşı, halal standartların tətbiqi iqtisadi və maliyyə inkişafı üçün əlverişli mühit yarada bilər. Halal sertifikatlaşdırma artıq qida, iaşə, turizm və kosmetika kimi sahələrdə də genişlənir. Məqsəd istehlakçılarda etimad yaratmaq və yeni imkanlar açmaqdır".
Anar Kərimov vurğulayıb ki, halal sertifikatlaşdırma etimad yaradır, etimad isə bazarları açır: "Hökumət risk əsaslı, proqnozlaşdırıla bilən və şəffaf maliyyə siyasəti formalaşdırmağa sadiqdir. Biz halal ekosistemində fəaliyyət göstərən beynəlxalq təşkilatlarla əməkdaşlığı gücləndiririk və bu tədbirdə iştirak edən tənzimləyici qurumlar, biznes assosiasiyaları və akademik dairələrlə açıq dialoqu davam etdirəcəyik".
Aygün Mirakif
