Prezident İlham Əliyevin himayəsi altında keçirilən II Azərbaycan Beynəlxalq İnvestisiya Forumu ölkəmizin investisiya imkanlarını dünyanın aparıcı investorlarına təqdim edən mühüm beynəlxalq platformadır. Forumun önəmi burada müzakirə olunan qlobal əhəmiyyətli iqtisadi mövzularla yanaşı, Azərbaycana gələn investorların miqyası və imkanları ilə də ölçülür. Müzakirələrdə "BlackRock/GIP", "Franklin Templeton", PGIM, "Brookfield", KKR, "Ares", "Neuberger Berman" kimi qlobal investisiya qurumları, eləcə də Türkiyə Sərvət, Sinqapurun "Temasek" fondları və digər böyük institusional investorların təmsil olunması, qurumların idarə etdikləri aktivlərin ümumi həcminin isə on trilyonlarla ABŞ dollarına çatması Azərbaycanın investisiya imkanlarına marağın göstəricisidir. Bununla yanaşı, ölkəmizin iri beynəlxalq kapital üçün təqdim etdiyi imkanların tanıdılması, birbaşa əlaqələrin genişləndirilməsi və beynəlxalq investisiya əməkdaşlığının gücləndirilməsi baxımından mühüm fürsətdir. Forum çərçivəsində artıq tikinti, rəqəmsal iqtisadiyyat, bərpaolunan enerji, sənaye, kənd təsərrüfatı, əczaçılıq, maliyyə və digər sahələri əhatə edən 11 sənəd imzalanıb. Təbii ki, qlobal iqtisadiyyatda baş verən dəyişikliklər, təchizat zəncirlərinin yenidən formalaşması, yeni nəqliyyat və enerji marşrutlarının yaranması, texnologiya və süni intellektin iqtisadi proseslərə təsirinin artması investisiya gündəliyinə də yeni yanaşmalar gətirir. Bu şəraitdə Azərbaycanın Avropa ilə Asiyanı birləşdirən strateji mövqeyi onun regional və qlobal bağlantılarda rolunu daha da artırır.
"BlackRock"/"Global Infrastructure Partners"
"BlackRock"-un 2026-cı il "Annual Chairman"s Letter" sənədində idarə olunan aktivlərinin həcminin 15.3 trilyon ABŞ dolları təşkil etdiyi qeyd olunur. Şirkət enerji, nəqliyyat, rəqəmsal infrastruktur, su və tullantıların idarə olunması sahələrində ixtisaslaşmış qlobal investisiya təsisatıdır.
"Global Infrastructure Partners"in (GIP) idarə etdiyi aktivlərin həcmi isə 170 milyard ABŞ dollarıdır. Bu şirkət həmçinin "BlackRock", "Microsoft" və MGX ilə birlikdə qlobal Süni İntellekt İnfrastruktur Fondunun əsas təsisçilərindəndir. 2026-cı ilin yanvarında Davosda Azərbaycan Respublikası Dövlət Neft Fondu (ARDNF), "BlackRock" və tərkibindəki "Global Infrastructure Partners" arasında uzunmüddətli əməkdaşlığa dair niyyət protokolu imzalanıb. Sənəd mövcud əməkdaşlığın uzunmüddətli, strateji çərçivədə davam etdirilməsini, eləcə də beynəlxalq infrastruktur investisiya platforması çərçivəsində Azərbaycanda potensial investisiya imkanlarının araşdırılmasını nəzərdə tutur.
Niyyət protokoluna əsasən, ARDNF-nin GIP tərəfindən idarə olunan infrastruktur fondlarına və birgə investisiya imkanlarına 3-4 il müddətində 1.5 milyard ABŞ dollarınadək kapital qoyuluşu imkanlarının nəzərdən keçirilməsi planlaşdırılır. Əməkdaşlıq çərçivəsində Azərbaycanda regional bulud və süni intellekt tələbatına xidmət edən məlumat mərkəzləri və infrastruktur üzrə potensial investisiya imkanlarının dəyərləndirilməsi, hava limanı infrastrukturu sahəsində "Global Infrastructure Partners"in əməliyyat və idarəetmə təcrübəsi nəzərə alınmaqla tərəfdaşlığın perspektivlərinin araşdırılması nəzərdə tutulur. Sənəd Dövlət Neft Fondunun qlobal investisiya ekosistemində mövqeyinin möhkəmləndirilməsinə, beynəlxalq tərəfdaşlarla əməkdaşlığın daha da genişləndirilməsinə və Azərbaycanın strateji əhəmiyyətli infrastruktur sahələrində uzunmüddətli investisiya imkanlarının formalaşdırılmasına töhfə verəcək.
"Franklin Templeton"
"Franklin Templeton"un 2026-cı il tarixində qeyd edilən idarə etdiyi aktivlərin həcmi 1,83 trilyon ABŞ dolları təşkil edib. Şirkətin fərqli əhəmiyyəti onun yalnız birbaşa layihələrə investisiya potensialında deyil, kapital bazarları və institusional investor şəbəkəsindədir. Ötən ilin sentyabrın 24-də Azərbaycan Prezidenti İlham Əliyev Nyu-Yorkda "Franklin Templeton" şirkətinin baş icraçı direktoru və prezidenti Cenni Conson ilə görüşündə qlobal investisiya mühiti, inkişaf etməkdə olan ölkələrin kapital bazarlarına çıxış imkanları və beynəlxalq tərəfdaşlıqların iqtisadi transformasiyada rolu ətrafında fikir mübadiləsi aparıb. Söhbət zamanı Azərbaycanla bu şirkət arasında əməkdaşlığın gələcək istiqamətləri müzakirə olunub.
"Neuberger Berman", PGIM
"Neuberger Berman" dünyanın iri müstəqil investisiya şirkətlərindən biridir. 613 milyard ABŞ dolları məbləğində aktivlərə malik olan şirkətin özəl bazarlar üzrə qlobal investisiya platforması 170 milyard ABŞ dollarından artıq investisiya öhdəliklərini idarə edir. Platformanın investisiya etdiyi fondların portfelləri 10 min 400-dən çox şirkəti əhatə edir ki, bu da "Neuberger Berman"ın qlobal investisiya fəaliyyətinin miqyasını göstərir. "Neuberger Berman" nümunəsi xüsusilə maraqlıdır. Çünki ARDNF ilə "Neuberger Berman" arasında əməkdaşlıq 2016-cı ildən davam edir.
PGIM ABŞ-nin "Prudential Financial" şirkətinin qlobal aktivlərin idarə edilməsi biznesidir. Şirkətin idarə etdiyi aktivlərin həcmi 2026-cı il tarixinə əsasən, 1.5 trilyon ABŞ dolları təşkil edib. PGIM səhmlər, sabit gəlirli alətlər, daşınmaz əmlak və alternativ investisiyalar daxil olmaqla həm açıq, həm də özəl bazarlarda fəaliyyət göstərir. 20 ölkədə 40 ofisdə 1500-dən çox investisiya mütəxəssisi ilə dünya miqyasında pərakəndə və institusional müştərilərə xidmət göstərir.
"Brookfield" - Azərbaycanın real aktivlərə çıxışı
"Brookfield Asset Management" qlobal miqyasda alternativ investisiya idarəçiliyi ilə məşğul olan şirkətlərdən biridir. Şirkətin rəsmi məlumatına görə, onun idarə etdiyi aktivlərin həcmi 1 trilyon ABŞ dollarını ötür, şirkət isə 50-dən çox ölkədə fəaliyyət göstərir. "Brookfield" ilə əməkdaşlıq artıq daha konkret mərhələdədir. 2026-cı ilin yanvarında ARDNF ilə "Brookfield Asset Management" arasında uzunmüddətli strateji əməkdaşlığa dair niyyət protokolu imzalanıb. Sənəd mövcud strateji münasibətlərin institusional əsasda daha da dərinləşdirilməsini, Fondun qlobal miqyasda nüfuzlu investisiya platformalarına çıxış imkanlarının genişləndirilməsini ehtiva edir. Bununla yanaşı, ARDNF-nin "Brookfield" tərəfindən idarə olunan fondlara və birgə investisiya layihələrinə 3-4 il müddətində ümumilikdə 1.4 milyard ABŞ dollarınadək kapital qoyuluşu imkanlarının dəyərləndirilməsi planlaşdırılır. Əməkdaşlıq çərçivəsində Azərbaycanda investisiya potensialı olan əsas sahələr, o cümlədən enerji keçidi və saxlancı, bərpaolunan enerji, rəqəmsal infrastruktur və digər sahələr üzrə imkanların araşdırılması nəzərdə tutulur.
KKR, "Ares Management Corporation"
KKR 2026-cı ilin göstəricinə görə ümumi aktivlərin idarə edilməsi isə 796.5 milyard dollar olub.
"Ares Management Corporation"-un idarə etdiyi aktivlərin həcmi isə 2026-cı il tarixinə 671 milyard ABŞ dollarından çox olub. Şirkət kredit, daşınmaz əmlak, özəl kapital və infrastruktur üzrə alternativ investisiyalar sahəsində fəaliyyət göstərir.
Türkiyə Sərvət Fondu
Türkiyə Sərvət Fondunun kapitalı 55 milyard 166 milyon 778 min ABŞ Dolları təşkil edir. Fondun aktiv portfeli 7 fərqli sektordan 36 şirkətdən, 2 lisenziyadan və daşınmaz əmlakdan ibarətdir. Türkiyə Sərvət Fondu ilə əməkdaşlıq da ayrıca əhəmiyyətlidir. Fondunun portfelində 7 fərqli sektordan 36 şirkətdən, 2 lisenziyadan və daşınmaz əmlakdan ibarətdir. Portfelə "Ziraat Bank", "Halkbank", "VakıfBank", "Borsa İstanbul", Türk Hava Yolları, "Turkcell", "Türk Telekom", BOTAŞ və digər strateji aktivlər daxildir.
Daha önəmlisi, 2026-cı ilin iyulunda Azərbaycan İnvestisiya Holdinqi ilə Türkiyə Sərvət Fondu arasında Strateji Əməkdaşlığa dair Anlaşma Memorandumu imzalanıb. Əməkdaşlıq çərçivəsində qurumlar hüquqi, maliyyə, texniki və əməliyyat sahələrində məlumat və təcrübə mübadiləsinin artırılmasını, birgə investisiya imkanlarının dəyərləndirilməsini və korporativ səviyyədə uzunmüddətli strateji əməkdaşlığın gücləndirilməsini hədəfləyir. Bu, Azərbaycan-Türkiyə iqtisadi əlaqələrini ticarətdən birgə investisiya və aktivlərin idarə olunması səviyyəsinə çıxarmaq potensialına malikdir.
Sinqapurun "Temasek fondu"
"Temasek"-in xalis portfel dəyəri 405 milyard 352 milyon ABŞ dolları təşkil edir.
Beləliklə, burada ən maraqlı məqam sadəcə müxtəlif şirkətlərin nümayəndələrinin Bakıya gəlməsi yox, bir sıra qurumlarla Azərbaycanın artıq real institusional əlaqələrinin mövcud olmasıdır.
Forumda regional enerji bağlantıları, yaşıl keçid və bərpaolunan enerji layihələrinin maliyyələşdirilməsi də ayrıca müzakirə olunub.
Qlobal infrastruktur investorları üçün bu sahənin üstünlüyü uzunmüddətli, proqnozlaşdırılan pul axını yarada bilən layihələrin mövcudluğudur. Azərbaycanın coğrafi mövqeyi Orta Dəhliz, Şərq-Qərb və Şimal-Cənub bağlantıları kontekstində uzunmüddətli infrastruktur investisiyalarına imkan yaradır. Bu səbəbdən forumun mövzusunda məhz "qlobal bağlantı" anlayışının önə çıxarılması təsadüfi deyil. Forum çərçivəsində Cənubi Qafqaz-Mərkəzi Asiya iqtisadi əməkdaşlığı və regional bağlantı imkanlarının da müzakirə olunması da bundan xəbər verir.
Oxu.Az-a Forumun əhəmiyyətindən və yaradacağı imkanlardan danışan Milli Məclisin İqtisadi siyasət, sənaye və sahibkarlıq komitəsinin üzvü Tahir Mirkişili bildirib ki, Prezident İlham Əliyevin himayəsi altında keçirilən İkinci Azərbaycan Beynəlxalq İnvestisiya Forumu ölkəmizin qlobal kapital ilə əlaqələrinin genişləndirilməsi baxımından mühüm hadisədir:
-tahir mirkisili (1):640.jpg)
"Belə platformalar Azərbaycanın investisiya imkanlarını birbaşa qərar qəbul edən şəxslərə təqdim etməyə və uzunmüddətli tərəfdaşlıqlar qurmağa şərait yaradır.
Forumda təmsil olunan qurumların təxminən trilyonlarla dollarlıq ABŞ dolları həcmində aktiv idarə etməsi iştirakçıların qlobal maliyyə sistemindəki çəkisini göstərir. Bu, Azərbaycan üçün dünyanın ən böyük kapital mərkəzləri ilə birbaşa dialoq imkanıdır. Əsas vəzifə həmin marağı iqtisadiyyatımıza yönələn konkret sərmayələrə çevirməkdir. İnvestor uzunmüddətli qərar verərkən gəlirliliklə yanaşı, sabitliyə, qaydaların aydınlığına və gələcək bazar imkanlarına baxır. Bu baxımdan, Azərbaycanın enerji potensialını, nəqliyyat bağlantılarını və sənaye imkanlarını bir-birini tamamlayan investisiya təklifi kimi təqdim etmək mühüm əhəmiyyət daşıyır. Ölkəmizdə qurulan istehsal və logistika layihələrinin regional bazarlara xidmət edə bilməsi də investor üçün əlavə üstünlük yaradır".
O hesab edir ki, belə tərəfdaşlıqlarda sərmayənin həcmi ilə yanaşı, iqtisadiyyata gətirdiyi keyfiyyət də mühüm amildir:
"Azərbaycana gələn investisiya yeni texnologiya, müasir idarəetmə təcrübəsi, yerli şirkətlər üçün sifarişlər və vətəndaşlarımız üçün daha məhsuldar, yüksək maaşlı iş yerləri yarada bilər. Xüsusilə qeyri-neft sənayesi, rəqəmsal infrastruktur, bərpaolunan enerji və logistika sahələrində bu yanaşma uzunmüddətli nəticə verər.
Forumun uğuru son nəticədə imzalanan sənədlərin işlək layihələrə çevrilməsi, istehsalın və ixracın artması ilə ölçüləcək. Artıq belə nəticələr var. Bakıdakı görüşlərin həm layihələrə çevrilməsi, həm də investorlarla davamlı iş vasitəsilə konkret nəticələrə çatdırılması Azərbaycanın iqtisadi şaxələndirmə siyasətinə mühüm töhfə verəcək".
