"Azərbaycanın sabit iqtisadi mühiti investor etimadını gücləndirir. Uzunmüddətli investisiya etimad və inam üzərində qurulur".
Oxu.Az xəbər verir ki, bunu Azərbaycanın iqtisadiyyat naziri Mikayıl Cabbarov Bakıda keçirilən İslam İnkişaf Bankı Qrupunun İllik Toplantısı çərçivəsində təşkil olunan "Azərbaycanın İnvestisiya Perspektivləri Sessiyası"nda çıxışı zamanı deyib.
Nazir qeyd edib ki, Azərbaycan investorlara güclü fiskal göstəricilər və praqmatik iqtisadi siyasətlə dəstəklənən sabit və dayanıqlı mühit təqdim edir:
"Ölkənin strateji valyuta ehtiyatları ümumi daxili məhsulun həcmini üstələyir. Bu ehtiyatlar ilin əvvəlindən 3.4 faiz, illik müqayisədə isə 15 faiz artaraq 88 milyard ABŞ dollarına çatıb. Sözügedən resurslar Azərbaycanın makroiqtisadi sabitliyini daha da möhkəmləndirir".
M.Cabbarov qeyd edib ki, qlobal miqyasda ən aşağı dövlət borcu səviyyələrindən birinə malik olan Azərbaycan üçün bu göstəricilər iqtisadi sabitlik, investor etimadı və uzunmüddətli inkişaf baxımından möhkəm zəmin yaradır:
"Bu fundamental göstəricilər aparıcı beynəlxalq reytinq agentlikləri tərəfindən də yüksək qiymətləndirilir. "Fitch Ratings" və "Moody's Ratings" Azərbaycanın suveren kredit reytinqini investisiya səviyyəsində saxlayaraq, onun perspektivini sabitdən pozitivə yüksəldiblər. Azərbaycanın iqtisadi inkişaf modelinin əsasında həm müstəqillik dövründə formalaşmış təcrübə, həm də iqtisadi rifahı dövlət siyasətinin mərkəzinə qoyan Prezident İlham Əliyevin strateji yanaşması dayanır. İqtisadiyyatın şaxələndirilməsi isə ölkənin investisiya gündəliyində getdikcə daha böyük əhəmiyyət kəsb edən əsas istiqamətlərdən biridir".
