ADSEA-nın sabiq idarə rəisi işçisini məhkəməyə verdi - 7,5 milyard mənimsəmə iddiası

Azərbaycan Dövlət Su Ehtiyatları Agentliyinin sabiq idarə rəisi qurumun aqronomunu məhkəməyə verib.

Oxu.Az-ın məlumatına görə, sabiq məmur Tale Şamçıyev qurumun aqronomu Məhəmməd Əliyevi onu şərləməkdə ittiham edib.

T.Şamçıyev xüsusi ittiham qaydasında Abşeron Rayon Məhkəməsinə müraciət edərək ADSEA əməkdaşının cərimələnməsini tələb edib.

Abşeron Rayon Məhkəməsində proses keçirilib və hökm elan olunub.

Məhkəmənin hökmü ilə M.Əliyev 1 500 manat cərimə edilib.

İttihama görə, M.Əliyev T.Şamçıyevin rəhbərlik etdiyi qurumun aqronomu olub. M.Əliyev T.Şamçıyevi idarənin 7 milyard 500 milyon manatını mənimsəməkdə ittiham edib və bu barədə Azərbaycan Dövlət Su Ehtiyatları Agentliyinin iclasında məsələ qaldırıb.

T.Şamçıyev isə bu iddianı özünə qarşı böhtan kimi qiymətləndirib və xüsusi ittiham qaydasında məhkəməyə müraciət edib.

Xatırladaq ki, T.Şamçıyev 2010-cu ildən 2016-ci ilə qədər FHN Bakı Regional Mərkəzinin rəis müavini, 2016-cı ildən 2024-cü ilə qədər isə Dövlət Su Ehtiyatları Agentliyinin idarə rəhbəri olub. O, 2024-cü ildə səhhəti ilə əlaqədar öz xahişi ilə vəzifəsindən azad edilib.