Dövlətə qarşı yönələn açıq çağırışlar etməkdə ittiham olunan Manaf Cəlilzadənin cinayət işi ilə bağlı məhkəmənin hazırlıq iclası baş tutub.
Oxu.Az xəbər verir ki, Bakı Ağır Cinayətlər Məhkəməsində hakim Aytən Əliyevanın sədrliyi ilə keçirilən iclasda təqsirləndirilən şəxsin anket məlumatları dəqiqləşdirilib.
İşin məhkəmə baxışına verilməsi barədə qərar qəbul olunub.
Məhkəmənin baxış iclası fevralın 26-na təyin edilib.
Məlumat üçün bildirək ki, Manaf Cəlilzadə Cinayət Məcəlləsinin 281.2-ci maddəsi ilə təqsirləndirilən şəxs qismində cəlb edilib. O, istintaq orqanından yayınaraq ölkə hüdudlarından kənarda gizləndiyi üçün barəsində axtarış elan olunub. Binəqədi Rayon Məhkəməsinin ötən ilin 15 fevral tarixli qərarına əsasən, onun barəsində qiyabi həbs qətimkan tədbiri seçilib.
Sentyabrın 19-da ittiham aktına əlavə və dəyişikliklər edilərək, Manaf Cəlilzadə barəsində Cinayət Məcəlləsinin 220.2-ci və 281.2-ci maddələri ilə təqsirləndirilən şəxs qismində cəlb etmə haqqında qərar çıxarılıb.
İttihama görə, o, 2019-cu il fevralın 17-də Süleyman Süleymanlı, Tofiq Mehmanov və digərləri ilə qabaqcadan əlbir olan qrup şəklində birləşərək İsveçrənin Cenevrə şəhərində, BMT-nin Cenevrə ofisi yaxınlığında ictimai yerdə Mehman Məmmədov və başqalarının Azərbaycanın konstitusiya quruluşunun zorla dəyişdirilməsinə yönələn çağırışlarını razılaşdırılmış şəkildə videoya çəkib. Həmin görüntüləri "YouTube" platformasındakı kanalında canlı yayımlayaraq Azərbaycanda qanuni hakimiyyətə qarşı zor tətbiqini təşviq edən açıq çağırışlar səsləndirib. Daha sonra 2023-cü il yanvarın 19-dan 2025-ci il iyunun 17-dək hazırladığı 19 müxtəlif videomüraciətdə ictimai asayişin və təhlükəsizliyin pozulmasına, hakimiyyət orqanlarını iflic vəziyyətə salmağa və insanların iradəsinə təsir etməyə çalışan açıq çağırışlar yayıb.
Təqsirləndirilən şəxsə xəbərdarlıq edilib ki, barəsində qiyabi icraat açıla bilər, qiyabi hökm və ya məhkəmənin digər qərarı çıxarıla bilər.
Qeyd olunub ki, məhkəmə çağırışına gəlmədiyi təqdirdə onun haqqında qiyabi icraat başlana, yekun məhkəmə qərarı və ya qiyabi hökm qəbul edilə bilər.
Elgün Həsənli
