"Suriyada Bəşər Əsəd rejimi devrildikdən sonra İran mediası və sosial şəbəkələrində qısa bir video davamlı şəkildə paylaşılır: "2008-ci ildə Dəməşqdə keçirilən Ərəb Dövlətləri Liqasının sammitində Liviya lideri Müəmmər Qəzzafi çıxış edir və həmkarlarına müraciətlə həmin ərəfədə edam olunmuş İraq prezidenti Səddam Hüseynə işarə edərək deyir: "Hamınızın növbəsi çatacaq, hər birinizin üstünə gələcəklər". Zalda gülüşmə qopur, o cümlədən Suriya prezidentinin gülüşü kadrlara düşür. Amma sonrakı illərdə baş verənlər heç də gülməli olmur: bu xəbərdarlığı edən Qəzzafinin özü də, sammitə qatılmaqdan imtina edən Misir prezidenti Hüsni Mübarək də, nəhayət, həmin tədbirə ev sahibliyi edən Bəşər Əsəd də devrilir və indi hər kəsi növbədə kimin olduğu düşündürür. Bəziləri "növbədə İraqdır!" söyləsə də, nəzərlər daha çox Tehrana dikilib".
Oxu.Az-ın məlumatına görə, bu barədə "Azad İran" "YouTube" kanalında yayımlanan yeni süjetdə qeyd olunub.
Bildirilib ki, hədəfdə İranın olduğunu hələ Suriyadakı proseslərin qızğın vaxtında - Hələb süqut etdikdən sonra rəsmi "Keyhan" qəzeti son hədəfin İran olduğunu yazıb:
"Nəşrdə bildirilib ki, "Müqavimət oxu"na daxil olan qüvvələr İranın qolları, bizim müttəfiqlərimiz və dostlarımızdır. Onlara hücum etmək bizim gücümüzə zərbə vurmaq deməkdir. Son günlər Hələbdəki döyüşlərdə bir neçə iranlı şəhid olub. Odur ki, bu yeni müharibənin və Hələbdəki fitnənin başlıca və son hədəfi İrandır". "İran diplomatiyası" portalı isə "Suriyadan sonra İranın növbəsidir?" sualını başlığa çıxararaq yazıb: "ABŞ, İsrail və çox güman ki, regionun bir neçə ölkəsi tərəfindən "Müqavimət oxu"nu dağıtmaq və bölgənin geosiyasi vəziyyətini dəyişdirmək üçün böyük və planlaşdırılmış qəsd həyata keçirilməkdədir. Bu plan uğur qazanarsa, sonda birbaşa İran İslam Respublikasının üzərinə gələcəklər".
