MSK qəzada həlak olan deputatlığa namizəd Nəsiman Yaqublu haqqında qərarı müzakirə edəcək

Mərkəzi Seçki Komissiyası (MSK) qəzada həlak olan deputatlığa namizəd Nəsiman Yaqublu haqqında qərarı sabah müzakirə edəcək.

Bu barədə "Report"un sorğusuna cavab olaraq, N.Yaqublunun namizədliyinin qeydə alındığı 125 saylı Zəngilan-Qubadlı seçki dairəsindən məlumat verilib.

Bildirilib ki, sabah MSK-nın iclasında seçki bülletenlərində namizəd kimi adı qeyd olunmuş Nəsiman Yaqublunun vəfatı ilə əlaqədar seçicilərə məlumatın çatdırılması qaydası ilə bağlı qərar qəbul olunacaq. Bundan sonra isə dairə seçki komissiyasına atılacaq addımlar haqqında müvafiq tapşırıq veriləcək.

Xatırladaq ki, Bakı Dövlət Universitetində müəllim işləyən Nəsiman Yaqublu tarixçi-professordur. O, Zəngilan-Qubadlı dairəsindən deputatlığa namizəd olub və Zəngilandan seçicilərlə görüşdən qayıdan zaman qəzaya düşüb. N.Yaqublu bu gün Bakıda dəfn edilib.