Paşinyanın ABŞ fiaskosu - Atlantik Şuranın baş nazirə sürpriz Azərbaycan məqaləsi

Ermənistan hökuməti ABŞ Prezidenti Donald Trampın administrasiyası ilə yaxınlaşmaq üçün dəridən qabıqdan çıxır. Baş nazir Nikol Paşinyanın sürpriz ABŞ səfərini də bu qəbildən hesab etmək olar.

Hökumət başçısı Vaşinqtonda Atlantik Şurasında keçirdiyi görüşlərdə region ölkələri ilə münasibətlər, sülh prosesi ilə bağlı müzakirələr aparıb, lakin Nikol Paşinyan gözlənilməz sürprizlə qarşılaşıb. Müzakirələr apardığı, debatlara qatıldığı bir dönəmdə Atlantik Şurasının saytında Azərbaycanla bağlı geniş məqalə dərc edilib. Azərbaycan məqalədə etibarlı, tolerant və sülh tərəfdarı olan ölkə kimi xarakterizə olunub.

Şübhəsiz ki, dünyanın nüfuzlu beyin mərkəzi olan Atlantik Şurası tərəfindən dərc olunan məqalə Tramp administrasiyasının Azərbaycanla münasibətlərə necə böyük önəm verməsinin göstəricisi hesab oluna bilər.

Ən önəmli olan isə məqalənin məhz erməni baş nazirin görüşlərinin keçirildiyi gündə dərcidir. "ABŞ Azərbaycan-İsrail əlaqələrinin dərinləşməsindən necə faydalana bilər" başlıqlı məqalədə Birləşmiş Ştatlarla Azərbaycan arasında münasibətlərin necə mühüm əhəmiyyət kəsb etdiyi vurğulanır.

Prezident İlham Əliyev ABŞ Prezidenti seçilən Donald Trampa göndərdiyi təbrik məktubunda da bunu xüsusi qeyd edib. Sabiq prezident Cozef Baydenin dövründə Azərbaycana qərəzli yanaşmanın şahidi olduq. Rəsmi Bakı da ümidvardır ki, Tramp administrasiyası dönəmində ABŞ-Azərbaycan münasibətlərinin balanslı və ikitərəfli faydalı siyasətinin şahidi olacağıq.

Məqalədə vurğulanır ki, Azərbaycanın tək bölgədə deyil, bütövlükdə beynəlxalq aləmdə nüfuzu artır.

Yeri gəlmişkən, Nikol Paşinyan Atlantik Şurasında çıxış edən zaman ölkəsinin dini dözümlülük sahəsində yaxşı nəticələri olduğunu iddia edib. Baş nazir çıxışında əvvəlki rəhbərlərinin aqressiv siyasəti nəticəsində ölkəsinin monodövlətə çevrilməsinə yer ayırmayıb. Halbuki, Atlantik Şurasının rəsmi səhifəsində yerləşdirilən məlum məqalədə məhz Ermənistanın deyil, Azərbaycanın tolerant, multikultural dəyərlərindən bəhs edilib.

Bildirilir ki, Azərbaycanda və beynəlxalq səviyyədə yəhudilərlə tarixən yaxşı münasibətlər də sıx əlaqələrin yaranmasına kömək edib: "Yəhudilər Azərbaycanda ən azı yeddinci əsrdən yaşayırlar və digər türk ölkələrində olduğu kimi, demək olar ki, antisemitizmlə üzləşməyiblər. Azərbaycan-yəhudi diaspor təşkilatlarının sözlərinə görə, heç bir ölkə öz yəhudilərinə Azərbaycan qədər dost və sədaqətli olmayıb. Yəhudi diaspor təşkilatları ilə mükəmməl əlaqələr Azərbaycan-ABŞ münasibətlərinin yaxşılaşmasına kömək edib.

Nüfuzlu "beyin mərkəzi"nin dərc etdiyi məqalə yeni ABŞ administrasiyasının mövqeyi kimi qəbul edilə bilər. Görünən odur ki, Tramp administrasiyası bölgədə gedən prosesləri diqqətlə izləyir. Gəldiyi qənaət isə bundan ibarətdir ki, regionda söz sahibi məhz Azərbaycandır.

Bu siyasət Trampın birinci prezidentliyi dövründə də əsas xətt kimi keçib və indi də bu məsələ prioritet olaraq nəzərdən keçirilir. Bu baxımdan, Ermənistan nə qədər özünü ABŞ-nin yeni administrasiyasına sırımağa çalışsa da, fərqli münasibət görməyəcək. Azərbaycan nəinki siyasi cəhətdən, həm də iqtisadi baxımdan regionda söz sahibidir, onun razılığı və iştirakı olmadan bölgədə hər hansı bir layihənin reallaşması mümkün deyil. ABŞ administrasiyası da bunu gözəl başa düşür.

Beləliklə, ABŞ-nin yeni administrasiyanın artıq öz seçimini etdiyini söyləmək mümkündür. Azərbaycan ABŞ üçün, o cümlədən Avropanın enerji təhlükəsizliyinin təmin edilməsi baxımından böyük əhəmiyyət kəsb edir. Ona görə də, hesab etmək olar ki, Prezident Donald Tramp dövründə Azərbaycan-Amerika münasibətləri yüksələn xətt üzrə inkişaf edəcək. Dediyimizi sübut edən əsas məqam isə budur ki, oraya gedən, münasibətləri yaxşılaşdırmağa çalışan Paşinyan olsa da, qurum Azərbaycanla münasibətlərə əhəmiyyət verən məqalə dərc edib.

"Report" İnformasiya Agentliyi