Dünən bir sıra erməni KİV-i işğal edilmiş Kəlbəcər rayonunda erməni sakinləri arasında panika yarandığı haqda məlumat yayıb. İnsanlar zəhərlənmiş sudan, gördükləri azərbaycanlı kəşfiyyatçılardan və onların tutulması üçün aparılan əməliyyatdan qorxu içində danışırdılar.
Axşama yaxın isə Ermənistan Müdafiə Nazirliyi azərbaycanlı təxribatçının tutulması və vəziyyətin erməni SQ-nın nəzarəti altında olduğu barədə bəyanatla çıxış edib.
Sübut kimi isə Azərbaycan bayrağının, rezin çəkmələrin və sovet dövrünə aid avtomatın olduğu bir şəkil verilmişdi.
Kəşfiyyatçılarımızın düşmən arxasına keçməsi faktına inanmaq çətin deyil. Bu, dəfələrlə olub. Amma onların rezin çəkmədə, bükülmüş bayraqla və mətbəx bıçağı ilə gəzdiklərini təsəvvür etmək çox çətindir. Görünüşə baxılırsa, ermənilər əhalini necə olursa olsun sakit etmək üçün növbəti dəfə gözdən pərdə asmağı qərara aldılar, təəccüblü deyil, əsl Ermənistana xas addımdır.
“Qədim Ermənistanın yüz kilometrlərlə ərazisinin azad edilməsi” üçün əməliyyatı və yeni “strateji” postların qurulması, əslində elə Ermənistanın öz ərazisində yüksəkliklərin tutulmasını hamımız xatırlayırıq.
Kəlbəcəri cəbhə xəttindən on kilometrlərlə məsafə ayırır. Müvafiq olaraq: ““böyük erməni təxribatı”nın nümayəndələri belə böyük məsafəni, şəkildə göstərilmiş rezin çəkmə ilə qət etməyi sınayıblarmı?” sualı meydana çıxır.
Azərbaycanın bayrağına gəldikdə isə... Azərbaycanlı diversant kəşfiyyata gedib və hər ehtimala qarşı özü ilə bayraq götürüb ki, birdən tutsalar, dərhal bilsinlər ki, hardan gəlib? Ümumiyyətlə, diversantlar axı həmişə özləri ilə öz ölkələrinin bayrağını da götürürlər, hə... Məntiq hardadır, yoldaşlar?
Son illər Azərbaycan Ordusu sürətlə silahlanır və dövlət yeni-yeni silah növləri alır. Lakin, erməni KİV-in təqdim etdiyi fotolarda guya Azərbaycan diversantından götürülmüş silahlara baxaq – köhnə, dağılmış Kalaşnikov avtomatı, F-1 qumbaraları və mətbəx bıçağı (!)...
Mətbəx bıçağı... Yəqin ermənilərdə ordunun təchizatı elə bir gündədir ki, özləri orduda mətbəx bıçağı gəzdirirlər və hesab edirlər ki, bütün dünyada belədir... Lakin dünyanın istənilən digər normal ölkəsində bütün əsgərlərin və əlbəttə ki, kəşfiyyatçıların xüsusi bıçağı var. Xalq arasında “limonka” kimi tanınan F-1 qumbaraları isə müdafiə xarakterli silah hesab olunur, partlayış zamanı onun qəlpələri 200 metrədək radiusda yayılır.
Hansı məntiqlə guya azərbaycanlı diversant, rezin çəkmə geyinib (yayda - !), əlinə bayraq, üzərində heç bir nişangahı olmayan köhnə avtomat və mətbəx bıçağı alıb kəşfiyyata gedib? Hə, özü ilə hücum üçün olan RQD-5 əl qumbaraları deyil, müdafiə xarakterli F-1 götürüb?
Buna görə, erməni KİV-ə və Ermənistan təbliğatı düşərgəsinin digər nümayəndələrinə tövsiyə edirik ki, növbəti dəfə təkcə özlərinin deyil, bütün dünyanın inana biləcəyi nağıl uydursunlar. Öz xalqını aldatmağı onlar yaxşı bacarırlar, lakin digər sağlam düşüncəli dünyanın isə onlara yalnız gülməyi gəlir.
Elvin Şirinli
www.oxu.az
