:1200.jpg)
Azərbaycan millisinin baş məşqçi postuna əsas namizəd müəyyənləşib.
Oxu.Az xəbər verir ki, Qurban Qurbanovun istefasından sonra boş qalan posta, böyük ehtimalla, italiyalı Ancelo Alessio gətiriləcək.
Matc.az saytının əldə etdiyi eksklüziv məlumata görə, 54 yaşlı mütəxəssis ötən həftə Bakıya gəlib və AFFA-nın inzibati binasında assosiasiya rəhbərliyi ilə görüşüb. Tərəflər arasında danışıqların ilkin mərhələsi onun yığmamızın “sükanı arxası”na keçmək ehtimalını artırıb. Görüş paytaxt restoranlarının birində şam yeməyi ilə yekunlaşıb.
Yığmamızın baş məşqçi postuna əsas namizəd olan italiyalı məşqçilik karyerasına 1998-ci ildə başlayıb. Altı il “Napoli”nin müxtəlif komandalarında çalışan Alessio sonradan “İmoleze” (2004-2005), “Masseze” (2006-2007) və SPAL-da (2008) baş məşqçi olub.
İtaliyalı mütəxəssis daha çox məşhur həmyerlisi Antonio Kontenin köməkçisi kimi tanınır. O, son səkkiz ildə bu mütəxəssisin köməkçisi olub. Alessio 2010-2011-ci illərdə “Syena”, 2011-2014-cü illərdə “Yuventus”da, 2014-2016-cı illərdə İtaliya millisində, 2016-2018-ci illərdə isə İngiltərə “Çelsi”sində Konte ilə çalışıb.
2012-ci ilin oktyabrından dekabra qədər isə “Yuventus”da baş məşqçi əvəzi olub. O, arxada qalan müddətdə üç dəfə İtaliya, bir dəfə İngiltərə çempionu olub, vətənində iki Superkubok qazanıb.
Məşqçilik fəaliyyətindən öncə isə Ancelo Alessio İtaliyanın müxtəlif klublarında çıxış edib. Sabiq yarımmüdafiəçi “Avellino” (1984-1987 və 1997), “Yuventus” (1987-1992), “Bolonya” (1988-1989, icarə), “Bari” (1992-1995), “Kosentsa” (1995-1997) və “Modena” (1997-1998) klublarında forma geyinib. Alessio “Yuventus”un futbolçusu kimi UEFA kuboku və İtaliya kubokunu başı üzərinə qaldırıb.
