Gürcüstanın Batumi şəhərində keçirilən kişi və qadın komandalararası Avropa çempionatında yığmalarımız bu gün növbəti görüşlərinə çıxacaq.
Oxu.Az xəbər verir ki, dörd xalla II pillədə qərarlaşmış kişi millimiz bu gün Avropa çempionatının reytinqcə VIII komandası olan Ukrayna ilə qarşılaşacaq.
Hər iki komanda ilk iki turda qalib gəldiyindən, bu görüş maraqla gözlənilir. İlk iki görüşdə rəqibləri ilə birinci lövhədə heç-heçə etmiş Şəhriyar Məmmədyarov qara fiqurlarla Vasili İvançukla görüşəcək.
İki xalla XV sırada olan qadın millimiz isə reytinqdə XXVI pillədə olan Avstriya ilə qarşılaşacaq.
Qeyd edək ki, kişi millimiz əvvəl Serbiya və Fransanı məğlub edib. Qadın millimiz isə ilk turda Latviyaya qalib gəlsə də, dünən İspaniyaya uduzub.
Səbuhi Musayev
