"Oralarda necədir?" rubrikasının yeni buraxılışı yayımlanıb.
Oxu.Az Baku TV-yə istinadla xəbər verir ki, bu dəfə Bakıdan 3 442 kilometr uzaqda, Aralıq dənizi sahilində yerləşən Tunis Respublikasının paytaxtı Tunisdən bəhs olunub.
Tarixi eramızdan əvvəl 814-cü ilə təsadüf edən, qədim finikiyalıların şəhəri sayılan və hazırda da qalıqları qorunan Karfagen bu müasir şəhərin yaxınlığında yerləşir.
Tunisli uşaqlar 6 yaşından məktəbə gedirlər. Dövlət məktəbləri pulsuz təhsil verir. Özəl məktəblərdə isə təhsil daha keyfiyyətlidir və hər sinifdə orta hesabla 20 şagird olur. Təhsil haqqı aya 70-350 dollar arasında dəyişir. Bu bizim pulla 119-595 manat edir.
Bu şəhərdə avtomobil idarə etmək üçün insanın əsəbləri poladdan olmalıdır. Yollarda nə piyada keçidi var, nə də piyada zolağı. Maşın yolundan keçmək üçün avtomobillərə əl ilə işarə edərək onları dayandırmaq lazım gəlir.
Tunisdə başı hicab ilə örtmək və ya avropalı kimi görünmək hər qadının öz arzusuna bağlıdır. Maraqlı məqamlardan biri isə odur ki, bəzən qadınlar ailə qurduqdan sonra ərlərinin istəyi ilə başlarını bağlayırlar. Bu kişini digər insanların yanında daha çox hörmətli edir. Amma bəzi qadınlar da ərləri bunu onlardan istəsə belə, həyat yoldaşlarına boyun əymirlər.
Tunisli qadınlar ərləri tərəfindən ailə münaqişəsi zamanı döyülsələr belə, polisə şikayət etmirlər. Cəmiyyətdə qatı dindar və müasir ailələrə rast gəlmək mümkündür. Hər iki tərəf öz ailə formatını daha doğru hesab edir.
Bu şəhərdə niqablı qadınlar dövlət müəssisələrində, ofislərdə çalışa bilməzlər. Bunun səbəbi isə terrorçuların çox vaxt niqabdan istifadə etmələridir.
Tunisdə müasir qadınlar da çoxdur. Onlar üzlərini gizlətmir, işləyir və həyatlarını istədikləri kimi yaşayırlar. Həyat yoldaşından boşanan qadınlar da ikinci dəfə ailə qura bilirlər.
