"Minalar Əleyhinə Azərbaycan Kampaniyası" İctimai Birliyi (İB) ölkədə kasetli silahlardan zərərçəkənlərin sayını açıqlayıb.
Oxu.Az-ın məlumatına görə, İB-nin sədri Hafiz Səfixanov bu gün keçirilən mətbuat konfransında bildirib ki, təşkilat ölkə ərazisində kasetli silahlardan zərərçəkənlərlə bağlı monitorinq keçirib.
"Monitorinq azad olunmuş ərazilərlə yanaşı, Yevlax, Gəncə, Mingəçevir Goranboy, Beyləqan, Ağdam və Şuşada keçirildi. Məlum oldu ki, həmin silahlar Birinci Qarabağ müharibəsində də Azərbaycana qarşı istifadə olunub. Tədqiqat zamanı Füzuli, Beyləqan, Bərdə, Ağdam, Goranboy, Şuşa, Mingəçevir şəhərlərinə də kasetli bombalar atıldığı məlum oldu. 1991-ci ildən 2025-ci ilə qədər baş verən kasetli mina hadisələri nəticəsində 233 nəfər mülki şəxs kasetli silahlardan zərər görüb. Onlardan səkkizi uşaq (beş qız, üç oğlan), 13-ü qadın olmaqla 51 nəfər həlak olub,182 nəfər xəsarət alıb. Vətən müharibəsindən sonra 12 nəfər kasetli silahdan zərər çəkib. Onlardan yeddisi hərbi qulluqçu, beş nəfəri isə mülki şəxslərdir.
Həmçinin Vətən müharibəsi dövründə 21 hərbçi kasetli silahdan zərər görüb. Onlardan iki nəfər həlak olub", - deyə o qeyd edib.
Samir Əli
