Bakı yağışdan çıxıb yağmura düşdü - Mikromobillik, yoxsa təhlükə mənbəyi?

Son vaxtlar Bakı şəhərində mikromobilliyin təmin edilməsi üçün salınan velosiped və skuter zolaqlarında hərəkət nəzərəçarpacaq dərəcədə intensivləşib.

Oxu.Az xəbər verir ki, özü-özlüyündə müsbət olan bu yenilik, paytaxtın nəqliyyat sistemində müəyyən problemləri də üzə çıxarıb.

Əsas narahatlıq doğuran məsələ mikromobillik zolağı ilə hərəkət edən skuter və velosiped sürücülərinin əksəriyyətinin yol-hərəkəti qaydalarına və təhlükəsizlik tədbirlərinə əməl etməməsidir. Buna misal olaraq bir neçə gün əvvəl skuterin vurduğu üçün ağır xəsarət alan Gənc Tamaşaçılar Teatrının aktrisası İradə Rəşidovanın başına gələn vəziyyəti göstərmək olar.

Skuterin vurması səbəbindən açıq kəllə-beyin travması, baş-beyin əzilməsi, ənsə nahiyəsinin kəllə ətraflarına keçən xətti sınığı, ənsə nahiyəsində dərialtı hematoma diaqnozları təyin edilən İradə Rəşidova Oxu.Az-a açıqlamasında bildirib ki, yolu keçərkən qəfildən skuter onu vurub.

"Onun kim olduğunu bilmədim. Ümumiyyətlə, bir anlıq nə baş verdiyini dərk etmədim. Vurdu və getdi. Yanımda yalnız iş yoldaşım olub. O da yolu keçərkən yanıma gəlib. Sonra isə məni həkimə apardılar. İlk olaraq polisə şikayət etmədim. Düşündüm ki, o da məni bilə-bilə vurmayıb. Sonra vəziyyətimin gözlədiyimdən ağır olduğunu gördükdə 39-cu Polis Bölməsinə şikayət verdim. Hələ ki, məni vuran şəxsin kim olması ilə bağlı bir məlumatım yoxdur", - deyə aktrisa bildirib.

Məsələ ilə bağlı Daxili İşlər Nazirliyinin Mətbuat Xidmətinin əməkdaşı, polis leytenantı Elbrus İbrahimov Oxu.Az-ın sorğusuna cavab olaraq hadisə ilə bağlı polisə müraciət daxil olduğunu təsdiqləyib.

"İyunun 6-da gecə saatlarında Səbail rayonu ərazisində vətəndaş İradə Rəşidovanın rayon ərazisində hərəkətdə olarkən skuterlə vurulması barədə polisə müraciət daxil olub. Hazırda vətəndaşın müraciəti əsasında ərazi üzrə polis orqanında araşdırma aparılır", - deyə E. İbrahimov bildirib.

Belə bir sual yaranır - mikromobillik zolağında bu cür piyadavurma hallarının baş verməsi qanunla necə tənzimlənir?

Baş Dövlət Yol Polisi İdarəsinin İctimai Qurumlarla Əlaqə Şöbəsindən Oxu.Az-ın sorğusuna cavab olaraq bildirilib ki, hazırda moped və kiçik elektrik nəqliyyat vasitələri ilə bağlı qanunvericiliyə bir sıra əlavə və dəyişikliklər edilib.

"Bu dəyişikliklərə əsasən, konstruktiv maksimal sürəti saatda 50 km-dən artıq olan bütün nəqliyyat vasitələri, o cümlədən mopedlər dövlət qeydiyyat nişanlarına təhkim olunmalıdır. Həmçinin həmin nəqliyyat vasitələrinin sürücüləri müvafiq sürücülük kateqoriyasına sahib olmalıdırlar.

Eyni zamanda, kiçik elektrik nəqliyyat vasitələri anlayışı qanunvericiliyə daxil edilib, onların sürücülərinin hüquq və vəzifələri müəyyənləşdirilib. Bu dəyişikliklər "Yol hərəkəti haqqında" Qanuna daxil edilib və uyğun olaraq İnzibati Xətalar Məcəlləsində müvafiq normalar nəzərdə tutulub.

Hazırda moped və kiçik elektrik nəqliyyat vasitələrinin iştirakı ilə baş verən yol hərəkəti qaydalarının pozulması və yol hərəkəti təhlükəsizliyi əleyhinə olan inzibati xətalar qeydə alınır. Əgər bu nəqliyyat vasitələrinin, eləcə də digər ikitəkərli nəqliyyat vasitələrinin iştirakı ilə piyadaların və digər hərəkət iştirakçılarının xəsarət alması, ölümü və ya maddi zərərlə nəticələnən yol-nəqliyyat hadisəsi baş verərsə, həmin hadisələr qanunvericiliyə uyğun şəkildə araşdırılır və nəticələrə əsasən hüquqi qiymət verilir.

Bununla yanaşı, Baş Dövlət Yol Polisi İdarəsi bu sahədə qanunvericilik bazasının təkmilləşdirilməsi, həmçinin ikitəkərli nəqliyyat vasitələrinin sürücülərinin yol hərəkəti qaydalarına qeyd-şərtsiz əməl etmələri istiqamətində mütəmadi və məqsədyönlü nəzarət-profilaktik tədbirlər həyata keçirir.

Xüsusilə vətəndaş cəmiyyəti institutları və medianın birbaşa dəstəyi ilə moped və skuter sürücüləri arasında maarifləndirmə, təbliğat və təşviqat işləri aparılır və bu istiqamətdə tədbirlərimiz davam etdirilir", - deyə məlumatda bildirilir.

Mikromobillik zolağında baş verən hadisə zamanı xəsarət alan şəxsin müəyyən olunması və məsuliyyəti məsələsinə gəlincə isə Şöbədən bildirilib ki, əgər hadisə zamanı xəsarət alan olursa, bu zaman xəsarət alan şəxsin sağlamlığına zərər dəydiyi üçün hadisənin baş verdiyi ərazi üzrə şəhər və yaxud da rayon polis orqanının tədqiqat qurumu, prosessual şəxs hadisə yerinə gəlir.

"Hadisə ilə bağlı müvafiq ekspertizalar təyin olunur. Sonda mütəxəssislərin verdiyi rəyə uyğun olaraq yetirilən xəsarətin dərəcəsi müəyyən olunur və ona uyğun olaraq hadisəni törədən şəxsin məsuliyyəti müəyyən edilir. Bu işlə artıq yol polisi deyil, istintaq-təhqiqat orqanı məşğul olur", - deyə məlumatda vurğulanır.

Əzizə İsmayılova