Bakının Sabunçu rayonunun Bakıxanov qəsəbəsində içməli suyun küçəyə axdığı iddia olunur.
Bu barədə Oxu.Az-ın qaynar xəttinə (+994 55 224-12-12) müraciət daxil olub.
Bildirilib ki, Əşrəf Yunusov küçəsi, 8 ünvanındakı binanın qarşısında içməli su günlərdir yola axır.
"Problem barədə aidiyyəti qurumlara məlumat versək də, məsələ hələ də həllini tapmayıb. Gəlib baxıb gedirlər, amma düzəldən yoxdur", - deyə şikayətdə bildirilib.
Oxu.Az-ın sorğusuna cavab olaraq İri Şəhərlərin Birləşmiş Su Təchizatı Xidmətindən bildirilib ki, sözügedən ünvanla bağlı müraciət rayonun sukanal idarəsinin cavabdeh şəxslərinə yönləndirilib:
"Sözügedən ünvanda su xəttində baş vermiş qəzanın aradan qaldırması üçün asfalt örtüyü sökülməli və qazıntı işləri aparılmalıdır.
Asfalt örtüyünün sökülməsi üçün aidiyyəti quruma müraciət olunub, cavab gələn kimi təmir-bərpa işlərinə başlanılacaq".
