"Yeni Şəhər Gündəliyinin prinsiplərinin tətbiqinə dair ən güclü nümunələrdən biri də Azərbaycanın azad edilmiş ərazilərində həyata keçirilən Böyük Qayıdış Proqramıdır".
Oxu.Az xəbər verir ki, bu fikirləri Dövlət Şəhərsalma və Arxitektura Komitəsinin Aparat rəhbərinin müavini, Bakıda keçirilən Ümumdünya Şəhərsalma Forumunun 13-cü sessiyasının (WUF13) milli əlaqələndiricisinin müavini Gülşən Rzayeva forum çərçivəsində keçirilən "Qlobal Mənzil Böhranı: Plan nədir?" adlı müzakirədə deyib.
O bildirib ki, təxminən otuz illik işğal dövründə məqsədli dağıntı və talana məruz qalan bu ərazilərdə genişmiqyaslı yenidənqurma və inkişaf işləri aparılır:
"Yeni Şəhər Gündəliyinin prinsipləri və şəhərsalmaya yeni yanaşma həmin ərazilərdə həyata keçirilən planlaşdırma layihələrinin və fəaliyyətlərinin əsasını təşkil edir. Bu ərazilər davamlılıq, dayanıqlılıq və inklüzivlik prinsipləri əsasında qurulur. "Ağıllı şəhərlər" və "ağıllı kəndlər", yaşıl enerji zonaları, iqlimə həssas planlaşdırma prosesin başlanğıcından etibarən əsas prioritetlərdən biri olub. Burada mənzil tikintisi nəqliyyat, təhsil, səhiyyə, məşğulluq və sosial xidmətlərə çıxışla birlikdə inkişaf etdirilir və "15 dəqiqəlik şəhər" prinsipləri tətbiq olunur. Bu isə mühüm bir həqiqəti nümayiş etdirir".
