"Könüllülük hərəkatını gənclərsiz təsəvvür etmək mümkün deyil".
Oxu.Az xəbər verir ki, bu sözləri Gənclər Fondunun icraçı direktoru Qədir Xəlilov Azərbaycan Könüllülərinin VII Həmrəylik Forumunda çıxışı zamanı deyib.
O bildirib ki, bu gün Azərbaycan dövləti hər bir gəncin qayğısına qalır, daim onun inkişafı üçün şərait yaradır:
"2024-cü ildə Azərbaycan könüllüləri nəinki ölkəmizdə, eyni zamanda, beynəlxalq arenada da yüksək səviyyədə, rəğbətlə qarşılanıblar. COP29 kimi vacib bir tədbirin təşkilinə 3 000-dən çox könüllü cəlb olundu. Bununla bərabər, 2023-cü ildə Türkiyədə baş verən dəhşətli zəlzələdən əziyyət çəkənlərə kömək missiyasında, o cümlədən Azərbaycanın azad edilmiş ərazilərindəki ekoloji aksiyada könüllülər çox əhəmiyyətli rol oynadılar".
Q.Xəlilov vurğulayıb ki, Azərbaycan könüllüləri ölkənin milli maraqlarının keşiyində dururlar:
"Könüllülük hərəkatını gənclərsiz təsəvvür etmək mümkün deyil. Yeddi ildir keçirilən Azərbaycan Könüllülərinin Həmrəylik forumları 100 mindən çox gənci əhatə edib. Forum Azərbaycanın əməkdaşlıq etdiyi beynəlxalq təşkilatların da diqqətindədir".
Aygün Mirakif
