Masallı rayonunun Böyük Xocavar kəndində, şəhid Emil Əzizov küçəsində sakinləri narahat edən vəziyyət yaranıb.
Oxu.Az-a müraciət edən sakin bildirib ki, küçədəki ağac birbaşa elektrik naqillərinə toxunur və xətlərin arasına girib.
Qeyd olunub ki, sözügedən ərazidə üç faza və bir neytral xətt ağacın arasından keçir. Ağacın digər hissəsi isə metal hasara toxunur.
Sakin iddia edib ki, küləkli havada ağacın elektrik xətlərinə toxunması və naqillərin bir-birinə dəyməsi nəticəsində qığılcım yaranır.
Onun sözlərinə görə, ərazidə yol kənarında uşaqlar da oynayırlar. Sakin ağacın elektrik xətlərinə və metal hasara toxunmasının ciddi təhlükə yaratdığını bildirərək aidiyyəti qurumların məsələyə müdaxilə etməsini istəyib.
Qeyd edək ki, məsələ ilə bağlı aidiyyəti quruma sorğu ünvanlanıb.
