Sabunçu rayonunun Maştağa qəsəbəsi, Sülh küçəsində yaşanan antisanitar vəziyyətlə bağlı problem artıq öz həllini tapıb.
Oxu.Az-ın əldə etdiyi məlumata görə, qəsəbə sakinlərinin şikayətlərinə səbəb olan ərazidəki tullantı qalaqları polisin müşayiəti ilə aidiyyəti dövlət qurumları tərəfindən təmizlənərək ərazi tullantılardan təmizlənib.
Sabunçu rayonunun Maştağa qəsəbəsinin Sülh küçəsində antisanitar vəziyyət hökm sürür.
Sakinlər bildirirlər ki, bəzi obyekt sahibləri və vətəndaşlar zibil konteynerlərinin boş olmasına baxmayaraq, tullantıları yerə atırlar. Hətta gecə saatlarında motosikletlə əraziyə zibil gətirib boşaldanların olduğu da iddia edilir.
Onların sözlərinə görə, ərazi vaxtaşırı təmizlənsə də, bir-iki gün sonra yenidən əvvəlki vəziyyət yaranır.
"Qoxudan rahat keçmək mümkün deyil. Bu vəziyyət müxtəlif xəstəliklərin yaranmasına səbəb ola bilər. Ərazi təmizlənir, amma qısa müddət sonra yenidən zibillənir", - deyə sakinlərdən biri qeyd edib.
Məsələ ilə bağlı Sabunçu Rayon İcra Hakimiyyətindən bildirilib ki, həmin ərazidə yerləşdirilən zibil qablarına toplanan tullantılar gündəlik daşınır:
"Buna baxmayaraq, yay mövsümündə xidmət müqaviləsindən yayınan qeyri-əhali qrupunun fəaliyyətindən və fərdi yaşayış evlərində toplanan qeyri-məişət tərkibli təhlükəsiz tullantıların qanunsuz formada daşınaraq gecə saatlarında qabların ətrafına atılması hallarına görə kiçik qalaqlanma yaranır. Əlavə olaraq, vətəndaşlar tərəfindən tullantıların kənara atılması da xoşagəlməz görüntülərin və antisanitariyanın yaranmasına səbəb olur. Tərəfimizdən bu kimi hallar fasiləsiz olaraq gündəlik aradan qaldırılır".
