Ağır yol-nəqliyyat hadisəsində ciddi xəsarətlər alan Asiman Əliyevin əlillik müavinətinin dayandırılması ailənin narazılığına səbəb olub.
Bununla bağlı Oxu.Az-ın qaynar xəttinə ailənin müraciəti daxil olub.
Ailənin sözlərinə görə, 27 yanvar 2008-ci il təvəllüdlü Asiman Əliyev 2013-cü il dekabrın 24-də avtomobil qəzası nəticəsində ağır bədən xəsarətləri alıb:
"Ona baş beyinin ocaqlı travması, müştərək qapalı çoxocaqlı kəllə-beyin travmasının qalıq əlamətləri, spastik paraplegiya, hər iki aşağı ətrafın paraparezi, eləcə də sağ və sol bud sümüklərinin yerdəyişən qapalı sınıqları diaqnozu qoyulub. Qəza baş verən zaman cəmi 5 yaşı olduğundan ona əlillik qrupu təyin edilməyib. Bunun əvəzinə sağlamlıq imkanları məhdud uşaq kimi dövlət qeydiyyatına alınıb. 2019-cu ildə keçirilən tibbi-sosial ekspertiza zamanı əlillik təyinatından imtina edilib. Lakin təkrar müraciətdən sonra, təxminən altı ay keçdikdən sonra Asiman Əliyevə əlillik müavinəti təyin olunub".
Valideyn bildirib ki, 2026-cı il yanvarın 27-də müavinətin ödənişi dayandırılıb:
"Fevralın 4-də növbəti dəfə tibbi-sosial ekspertiza komissiyasından keçsək də, iyun ayında müraciətə imtina cavabı verilib. Təqdim olunan qərarda isə imtinanın səbəbi göstərilməyib".
Oxu.Az-a açıqlamasında Dövlət Tibbi-Sosial Ekspertiza və Reabilitasiya Agentliyinin şöbə müdiri Tural Qurbanov bildirib ki, Saatlı rayon sakini 2008-ci il təvəllüdlü Asiman Firudin oğlu Quliyev tibb müəssisəsi tərəfindən rəsmiləşdirilən "forma-88" göndərişi əsasında elə bu gün agentliyə dəvət olunaraq əyani müayinə edilib.
"Müayinə nəticəsində müəyyən edilib ki, vətəndaşın hazırkı sağlamlıq vəziyyəti əlillik təyinatına əsas verir. Bu səbəbdən də Asiman Quliyev qanunvericiliyə uyğun olaraq yaxın vaxtlarda müvafiq sosial ödənişlərlə təmin olunacaq", - deyə T.Qurbanov vurğulayıb.
