Sumqayıt-Pirşağı-Bakı marşrutu üzrə hərəkət edən sərnişin qatarının hərəkətində gecikmə qeydə alınıb.
Bu barədə Oxu.Az-ın qaynar xəttinə (+994 55 224-12-12) müraciət daxil olub.
Qeyd edilib ki, saat 06:43-də Sumqayıt stansiyasından yola düşən 6606 nömrəli qatarın saat 07:35-də Bakı stansiyasına çatması nəzərdə tutulsa da, bu gün qatar mənzil başına saat 07:54-də çatıb. Sərnişin bildirib ki, qatar Bakı istiqamətində hərəkət edərkən Sabunçu stansiyasında da heç bir səbəb göstərilmədən təxminən beş dəqiqə dayanıb.
Nəticədə sərnişinlər mənzil başına 19 dəqiqə gecikmə ilə çatıblar.
Oxu.Az-a açıqlamasında "Azərbaycan Dəmir Yolları" QSC-nin (ADY) İctimaiyyətlə əlaqələr şöbəsinin müdiri Bəxtiyar Hacıyev faktı təsdiqləyib.
"Bu gün səhər saatlarında Sumqayıt-Pirşağı-Bakı marşrutu üzrə hərəkət edən sərnişin qatarı Sabunçu Dəmiryol Vağzalında olarkən sərnişinlərin qatarın qapılarının bağlanmasına mane olması səbəbindən sistem bloklanıb və qapılar bir müddət bağlanmayıb. Nəticədə qatarın hərəkətində gecikmə yaranıb.
Sərnişinlərdən qatarın qapılarının bağlanmasına mane olmamaları, hərəkətin təhlükəsizliyi və qatarların müəyyən edilmiş qrafiklə hərəkətinin təmin edilməsi baxımından bu kimi hallara yol verməmələri xahiş olunur.
Nəzərə almaq lazımdır ki, qatarların intensiv hərəkət etdiyi saatlarda bir qatarın ləngiməsi digərlərinin də qrafikinə təsir göstərərək əlavə gecikmələrə səbəb ola bilər. Hər bir sərnişinin məsuliyyətli davranışı qatarların təhlükəsiz və qrafik üzrə hərəkətinə töhfə verir", - deyə B.Hacıyev bildirib.
