Abdullah Öcalanın tərəfdarlarına müraciət edəcəyi tarix məlum olub

Kürdüstan İşçi Partiyası (PKK) terror təşkilatının Türkiyədə həbsdə olan lideri Abdullah Öcalanın mart ayından gec olmayaraq tərəfdarlarına müraciət edəcəyi gözlənilir.

Oxu.Az xəbər verir ki, bu barədə "Hürriyet" nəşri məlumat yayıb.

Qeyd olunur ki, A.Öcalanla razılıq əldə etmək və onun müraciətinin təşkili prosesi Türkiyə parlamentində təmsil olunan kürd yönümlü Türkiyə Xalqların Bərabərliyi və Demokratiya Partiyası (DEM Partiya) tərəfindən həyata keçirilir.

Belə ki, təşkilatın üzvləri son bir neçə ayda iki dəfə həbsxanada A.Öcalanı ziyarət ediblər və yaxın vaxtlarda Ədliyyə Nazirliyindən üçüncü görüş üçün icazə istəyiblər. Bu səfər zamanı PKK-ya müraciət məsələsinin həll olunacağı güman edilir.

Bundan əvvəl DEM partiyasının nümayəndələri İraqda, o cümlədən, İraq Kürdüstanında Təlabani və Bərzani ilə də danışıqlar aparıblar.

Mənbə yazır ki, Bərzani ailəsi A.Öcalanın PKK-ya çağırış etməsi fikrini tam dəstəkləyir, Təlabaninin yanaşması isə daha təmkinli, eyni zamanda, müsbətdir. Bu isə PKK liderinin müraciətinin önəmini artırmalıdır.

Abdullah Öcalanın tərəfdarlarına müraciət edəcəyi tarix məlum olub