Vaşinqton və ətraf ərazilər üçün tornado, fırtına, daşqın və havanın çirklənməsi ilə bağlı xəbərdarlıqlar verilib.
Oxu.Az xəbər verir ki, bu barədə ABŞ Milli Meteorologiya Xidməti məlumat yayıb.
Məlumata görə, tornado təhlükəsi yerli vaxtla saat 21:00-dək (Bakı vaxtı ilə bazar günü saat 04:00-dək) davam edəcək. Qolf topu ölçüsündə dolu və tornado riski yaradan fırtına ilə bağlı xəbərdarlıq Vaşinqtona yaxın Merilend ştatının beş dairəsini və təxminən 20 yaşayış məntəqəsini əhatə edir. Küləyin sürətinin saniyədə 26 metri keçəcəyi, dolunun diametrinin isə 2.5 santimetrə çata biləcəyi gözlənilir.
Fırtınanın mərkəzi paytaxtdan təxminən 80 kilometr şimal-qərbdə qeydə alınıb. Sinoptiklər dağıdıcı küləyin ağacların və budaqların aşmasına səbəb ola biləcəyi barədə xəbərdarlıq edirlər. Bu, insanların xəsarət almasına, evlərə və avtomobillərə ziyan dəyməsinə, eləcə də yolların bağlanmasına səbəb ola bilər.
Bundan əlavə, Vaşinqton, Merilend və Virciniya ştatlarının bir sıra əraziləri üçün daşqın təhlükəsi elan olunub. Güclü yağıntılar səbəbindən çayların və dərələrin daşması, alçaq ərazilərin, şəhər daxilində drenaj sistemi zəif olan yerlərin su altında qalması ehtimalı yüksəkdir.
Həmçinin, Merilendin bəzi şəhərətrafı ərazilərində Kanadadakı meşə yanğınlarının gətirdiyi tüstü səbəbindən havanın çirklənməsi ilə bağlı xəbərdarlıq qüvvədədir.
