Massaçusets Məhkəməsi Təhsil Departamentinin qənaətinə görə antisemitizm probleminin öhdəsindən gələ bilmədiyi səbəbindən ABŞ administrasiyasının Harvard Universitetinə tətbiq etdiyi 2.2 milyard dollardan çox məbləğdə qrantın bloklanması qərarını qanunsuz hesab edib.
Oxu.Az-ın xəbərinə görə, bu barədə "İzvestiya" nəşri məlumat verib.
Məlumata görə, hakim Ellison Berrouz ABŞ administrasiyasının arqumentlərini rədd edib. Onun məhkəmənin elektron məlumat bazasında dərc olunmuş qərarına əsasən, ölkə rəhbərliyi antisemitizmdən ölkənin aparıcı universitetlərinə qarşı məqsədyönlü, ideoloji motivli hücum üçün pərdə kimi istifadə edib.
"Bu hərəkətlər onilliklər boyu aparılan tədqiqatları və bu tədqiqatın nəticələrindən faydalanacaq şəxslərin rifahını təhlükə altına qoydu. Bundan əlavə, belə addımlar Konstitusiyada və federal qanunlarda təsbit olunmuş hüquqlara hörmətsizlik nümayiş etdirdi", - deyə sənəddə bildirilib.
Hakim qeyd edib ki, o, antisemitizmlə maliyyələşdirmənin bloklanmasının təsiri altına düşən tədqiqat layihələri arasında açıq bir əlaqə görmür. Eyni zamanda, Ellison Berrouz vurğulayıb ki, son illərdə Harvard Universiteti antisemitizmin təzahürlərindən əziyyət çəkib və bu problemin həlli üzərində daha yaxşı işləməli idi.
Xatırladaq ki, aprelin ortalarında ABŞ Təhsil Departamenti Harvard üçün 2,2 milyard dollarlıq qrantların və 60 milyon dollarlıq uzunmüddətli müqavilələrin dondurulduğunu elan edib. Bundan əvvəl ABŞ administrasiyası təhsil müəssisəsinin siyasətində dəyişiklik edilməsini tələb edib və bunu yəhudiəsilli tələbələrin antisemitizmdən qorunması ilə əsaslandırıb.
"The New York Times" nəşrinin iddia etdiyi kimi, Harvard Ağ Evlə əməkdaşlıq etməyə çalışıb, lakin sonradan tələblər siyahısı "antisemitizmlə heç bir əlaqəsi olmayan maddələr" daxil edilməklə genişləndirilib. Harvard Universitetinin prezidenti Alan Qarber isə onları yerinə yetirməkdən imtina edib.
