Cənubi Afrikanın Antarktidadakı "Sanae IV" tədqiqat bazasında alimlər arasında ciddi münaqişə baş verib. Stansiyada işləyən tədqiqatçılardan biri həmkarlarına hücum etməkdə, hədələməkdə və cinsi zorakılıqda ittiham olunur.
Oxu.Az-ın məlumatına görə, bu barədə "The Times" Cənubi Afrikanın ətraf mühit naziri Dion Corca istinadən xəbər verir.
Onun sözlərinə görə, hadisə tədqiqat qrupunun rəhbəri ilə alimlərdən biri arasında sözlü mübahisə ilə başlayıb, bundan sonra tədqiqatçı öz rəhbərinə hücum edib.
Nazir qeyd edib ki, məhdud məkan və təcrid şəraitdə insanlar arasında gərginlik arta bilər, bu da dezoriyentasiya və stresə səbəb ola bilər.
"Sanae IV" bazası Antarktidanın sərt şəraitində yerləşir, burada orta qış temperaturu -23°C təşkil edir, küləyin sürəti isə 60 m/s-ə çata bilər. Antarktida iqlimini öyrənmək üçün stansiyaya gələn alimlər təxliyəni çətinləşdirən ekstremal hava şəraiti səbəbindən orada ən azı 10 ay qalmağa məcburdurlar.
Qeyd edilib ki, keçən həftə bazadan kömək xahişi ilə təşviş dolu məktub daxil olub. Məktubda bildirilib ki, hücum edən alim bütün komanda üçün ciddi təhlükə yaradır. O, təkcə həmkarlarından birinə divan tutmaqla hədələməyib, həm də başqa bir tədqiqatçıya qarşı cinsi zorakılıqda ittiham olunub.
Nazir Corc vurğulayıb ki, çətin iş şəraiti səbəbindən Antarktidaya göndərilməzdən əvvəl bütün alimlər ciddi psixososial müayinədən keçirlər. "Sanae IV" bazasında meteorologiya, tibb və mühəndislik sahəsində ekspertlər çalışırlar.
