"Apple" şirkətinin bazar kapitallaşması iyulun 27-də keçirilən hərracların yekununda təxminən beş trilyon dollara çataraq şirkətə yenidən dünyanın ən bahalı şirkəti statusunu qazandırıb.
Oxu.Az xəbər verir ki, bu barədə "Business Insider" məlumat yayıb.
Ticarət sessiyası zamanı "Apple" səhmləri 2% bahalaşıb. Son vaxtlar lider olan "Nvidia"nın səhmləri isə 5% ucuzlaşıb və şirkətin bazar dəyəri 4.77 trilyon dollara enib.
Nəşrin yazdığına görə, investorlar "Moonshot AI" Çin startapının yeni süni intellekt modelini təqdim etdikdən sonra "Nvidia" səhmlərini satmağa başlayıblar. Bazarda yenidən "DeepSeek anı"nın təkrarlana biləcəyi ilə bağlı narahatlıqlar yaranıb.
"DeepSeek anı" dedikdə 2025-ci ilin yanvarında Çin startapı "DeepSeek"in "OpenAI" modelləri ilə müqayisə edilən, lakin xeyli ucuz başa gələn "R1" süni intellekt modelini təqdim etməsi nəzərdə tutulur. Həmin vaxt "Nvidia" səhmləri bir sessiyada 17% ucuzlaşmış, şirkət təxminən 600 milyard dollar bazar dəyəri itirmişdi. Texnologiya şirkətlərinin ümumi itkiləri isə 1 trilyon dolları ötmüşdü.
Bundan əlavə, "Nvidia"nın "OpenAI" ilə 250 milyard dollarlıq məlumat emalı mərkəzinin maliyyələşdirilməsi barədə danışıqlar apardığı xəbərləri də investorların narahatlığını artırıb.
Qeyd olunur ki, "Apple" bu ay ərzində bir dəfə də "Nvidia"nı geridə qoymuş, lakin sonradan liderliyi yenidən itirmişdi. Son bahalaşma investorların vəsaitlərini süni intellekt şirkətlərindən digər texnologiya sektorlarına yönəltməsi ilə bağlı olub.
Bundan başqa, "Apple" səhmləri şirkətin "Apple Upgrade" adlı cihaz lizinq proqramına başlayacağı barədə xəbərlərdən sonra da yüksəlib. Proqramın iyulun 28-də istifadəyə verilməsi planlaşdırılır və "iPhone", "Mac", "iPad" və "Apple Watch" modellərinin əksəriyyətini əhatə edəcək.
