Böyük Britaniya hökuməti Ukraynanın bərpa prosesi üçün əlavə olaraq 290 milyon funt sterlinq (təqribən 380 milyon ABŞ dolları) məbləğində maliyyə vəsaiti ayırıb.
Oxu.Az xəbər verir ki, bu barədə Birləşmiş Krallığın xarici işlər naziri İvet Kuper açıqlama verib.
Təsdiqlənmiş yeni yardım paketi Böyük Britaniyanın "Urenco" şirkəti ilə Ukraynanın "Energoatom" dövlət şirkəti arasında nüvə yanacağı təchizatına dair 210 milyon funt sterlinq dəyərində razılaşmanı əhatə edir. Həmçinin rəsmi London Avropa Yenidənqurma və İnkişaf Bankı ilə birgə Ukraynada bərpa olunan energetika və bank sektorunu əhatə edən layihələrə 65 milyon funt sterlinqədək vəsait xərcləyəcək. "Bu sərmayələr çərçivəsində iki külək elektrik stansiyasının tikintisi və "Lviv" bankı tərəfindən biznes subyektlərinə dəstək göstərilməsi nəzərdə tutulur", - deyə Britaniya Xarici İşlər Nazirliyinin məlumatında vurğulanır.
Bundan başqa, Britaniya müəssisələri Lvov aeroportunun modernləşdirilməsində iştirak edəcəklər. Ayrılan maliyyənin bir qismi Ukraynada antikorrupsiya proqramlarının icrasına, dövlət idarəçiliyi və məhkəmə-hüquq islahatlarına yönəldiləcək. Kuper bu barədə Qdansk şəhərində təşkil olunmuş Ukraynanın bərpasına həsr edilmiş konfransda çıxışı zamanı danışıb. Ümumilikdə, 2022-ci ildən etibarən Birləşmiş Krallığın Ukraynaya göstərdiyi qeyri-hərbi təyinatlı yardımın məbləği 5.6 milyard funt sterlinqə (7.4 milyard dollar) yüksəlib.
