Braziliyada iyunun 20-nə keçən gecə milyonlarla sakinin mobil telefonuna yadplanetlilərin hücumu və ya "mizantrapiya" ifadəsini ehtiva edən saxta fövqəladə xəbərdarlıq bildirişləri göndərilib.
Oxu.Az G1 portalına istinadən xəbər verir ki, bu barədə Mülki Müdafiə və Mülki Müdafiə Katibliyinin rəhbəri Volney Volf məlumat verib.
Bildirilib ki, göndərilən xəbərdarlıqların bir hissəsi telefonlarda yüksək səs siqnalı ilə müşayiət olunub.
"Diqqət: YADPLANETLİ HÜCUMU. İnsanlar, biz gəldik", - deyə mesajlardan birində qeyd olunub və sakinlərə guya yadplanetlilərin hücumundan qorunmaq üçün tövsiyələr verilib.
Bəzi bildirişlərdə isə orfoqrafik səhvlərə də rast gəlinib.
Volney Volfun sözlərinə görə, dövlətin fövqəladə xəbərdarlıq sistemi haker hücumuna məruz qalıb. Milli Mülki Müdafiə Xidmətinin mətbuat xidməti bildirib ki, xəbərdarlıq platformasının fəaliyyəti gecə saat 01:30-da dayandırılıb.
"Defesa Civil Alerta" fövqəladə xəbərdarlıq platforması şənbə günü saat 01:30-da söndürülüb. Sistemin sındırılmasından sonra ölkənin müxtəlif bölgələrinə saxta xəbərdarlıq mesajları göndərilib. Siqnallar Milli Mülki Müdafiə Sistemi ilə əlaqəsi olmayan şəxs tərəfindən uzaqdan ötürülüb", - deyə qurumun açıqlamasında bildirilir.
Hadisə ilə bağlı hüquq-mühafizə orqanları araşdırma aparır.
