Ermənistanın sabiq prezidenti ilə bağlı istintaq davam edir

Ermənistanın sabiq prezidenti Armen Sarkisyanın xarici vətəndaşlığı ilə bağlı iş üzrə ilkin istintaq davam edir.

Oxu.Az Ermənistan KİV-ə istinadən xəbər verir ki, bu barədə İstintaq Komitəsi məlumat verib.

Lakin qurum heç bir təfərrüatı açıqlamayıb.

Daha əvvəl işin Milli Təhlükəsizlik Xidmətindən İstintaq Komitəsinə ötürüldüyü müəyyən edilib.

Xatırladaq ki, Armen Sarkisyan 2018-2022-ci illərdə Ermənistanın prezidenti olub. 2022-ci ilin yanvarında o, istefa verib və ölkədəki siyasi proseslərə təsir etmək üçün kifayət qədər səlahiyyətlərinin olmadığını bildirib.

İstefa bəyanatından bir gün sonra Hetq.am nəşri Sarkisyanın prezident seçilməzdən əvvəl Sent-Kits və Nevis - kiçik Karib dövlətinin vətəndaşlığına sahib olduğu barədə məlumat yayıb.

Nəşrin məlumatına görə, o bunu 500 min dollar məbləğində investisiya müqabilində əldə edib. Ermənistan Konstitusiyasına görə, xarici vətəndaşlığın olması prezident seçilmək hüququndan məhrum edir.