Böyük Britaniyanın məşhur "Financial Times" nəşri 2025-ci il üçün siyasət, iqtisadiyyat, texnologiya sahələrinə dair proqnozlarını dərc edib.
Oxu.Az xəbər verir ki, əsas proqnozlar arasında Ukrayna ilə Rusiya arasında münaqişəyə son qoyulması istiqamətində mühüm addım ola biləcək sülh müqaviləsinin imzalanması yer tutur. Analitiklər hesab edirlər ki, Vaşinqton Moskvaya sanksiyaları və Kiyevə silah tədarükünü artıraraq Rusiyanın sülh müqaviləsinə imza atmasına nail ola bilər, lakin bunun qarşılığında Ukrayna təhlükəsizlik təminatları naminə bəzi ərazi güzəştə getməli olacaq.
Nəşrin iqtisadi proqnoza dair yazısında qeyd olunub ki, analitiklər yüksəliş trendini davam etdirən "Bitcoin"in qiymətinin 2025-ci ilin sonuna kimi 200 min dollara çata biləcəyini ehtimal edirlər.
Beynəlxalq siyasət sferasına gəlincə, İsrail və ABŞ-nin İranın nüvə obyektlərinə hücumdan çəkinəcəyi proqnozlaşdırılır.
Bundan əlavə, sərt iqtisadi siyasətləri ilə tanınan ABŞ-nin yeni seçilmiş Prezidenti Donald Trampın əsasən Çinə qarşı yeni tarif müharibəsinə başlayacağı gözlənilir.
Nəşr Avropa siyasətinə dair proqnozları da dərc edib.
"2017-ci ildən bu vəzifədə olan hazırkı Fransa prezidenti Emmanuel Makron iqtidardakı mövcudluğunu qoruyub saxlayacaq", - deyə qəzet yazır.
Proqnozda, həmçinin qeyd olunub ki, məşhur sahibkar İlon Mask və Donald Tramp ictimai sferada dəfələrlə ziddiyyətli fikirlər səsləndirsələr də, dostluq münasibətlərini davam etdirəcəklər.
