Argentinanın Xarici İşlər Nazirliyi (XİN) Buenos-Ayresin razılığı olmadan mübahisəli Malvin (Folklend) adaları bölgəsində neft ehtiyatlarını mənimsəyən "Navitas Petroleum" və "Eco (Atlantic) Oil & Gas" şirkətlərinə qarşı məhkəmə iddiası qaldırmaq niyyətindədir.
Oxu.Az xəbər verir ki, bu barədə ölkə prezidenti Xavyer Mileyin mətbuat xidməti məlumat yayıb.
"Bu gün xarici işlər, beynəlxalq ticarət və din naziri Pablo Kirno "Navitas Petroleum Development & Production Ltd.", "Navitas Petroleum Atlantic United", "Navitas Petroleum LP", "JHI Associates Inc." və "Eco (Atlantic) Oil & Gas" şirkətlərinə qarşı cinayət işi başladır", - deyə bəyanatda qeyd olunub.
XİN-in məlumatına əsasən, adıçəkilən müəssisələr Argentina qanunvericiliyini pozaraq Böyük Britaniyanın qeyri-legitim hökumətindən Şimali Malvin hövzəsində karbohidrogenlərin kəşfiyyatı və hasilatı üçün lisenziyalar əldə ediblər. Argentina rəhbərliyi yalnız şirkətlərin özlərinə deyil, həm də onların səhmdarlarına qarşı məhkəməyə müraciət etməyi planlaşdırır.
Qeyd edək ki, sentyabrın 3-də Miley xalqa müraciətində Malvin adaları yaxınlığında neft hasilatı ilə məşğul olan şirkətlərə qarşı sanksiyaları daha da sərtləşdirəcək qanun layihəsini parlamentə təqdim edəcəyini bildirmişdi.
