Haitidə silahlı quldurların törətdiyi hücum nəticəsində 110 nəfər həlak olub.
Oxu.Az xəbər verir ki, bu barədə "Reuters" məlumat yayıb.
Məlumata görə, hadisə "Uarf Jeremi" dəstəsinin başçısı Monel Feliksin göstərişi ilə baş verib. Feliksə "vudu" cadugərlərindən biri azyaşlı oğlunun ölümündə yaşlı bir falçının günahkar olduğunu bildirib. Bundan sonra o, dəstə üzvlərinə Haitinin Siti-Soleil bölgəsindəki bütün yaşlı falçıları öldürmək barədə əmr verib.
Hücumun qurbanlarının hamısının 60 yaşdan yuxarı şəxslər olduğu bildirilib.
Qeyd edək ki, Siti-Soleil Haitinin ən yoxsul və ən təhlükəli bölgələrindən biridir. Əraziyə quldur dəstələri nəzarət edirlər və onlar sakinlərin kənar aləmlə əlaqəsini və cinayətlər barədə məlumat vermə imkanlarını məhdudlaşdırırlar.
Haiti hökuməti ölkədə artan silahlı dəstələrin gücünün qarşısını almaqda çətinlik çəkir. 2022-ci ildə səlahiyyətlilər yerli polisin dəstəklənməsi üçün beynəlxalq yardım istəyiblər. Lakin 2023-cü ildə göndərilən BMT missiyasının təsir resurslarının məhdud olduğu vurğulanır.
