ABŞ-İran danışıqlarının üçüncü raundunun vaxtı açıqlanıb

İran və ABŞ nümayəndə heyətləri Romadakı danışıqlar zamanı bir sıra məsələlərdə daha geniş qarşılıqlı anlaşma əldə edə biliblər.

Oxu.Az xəbər verir ki, bunu İranın xarici işlər naziri Abbas Əraqçı ABŞ nümayəndə heyəti ilə görüşün yekunları ilə bağlı deyib.

"Bu gün danışıqlar dörd saat davam etdi. Bu dəfə biz bir sıra məsələlərdə daha geniş qarşılıqlı anlaşma əldə edə bildik", - İran XİN rəhbəri Abbas Əraqçı bildirib.

O, ABŞ ilə Romada məsləhətləşmələrin faydalı olduğunu və konstruktiv atmosferdə keçdiyini vurğulayıb.

Nazir əlavə edib ki, tərəflər arasında növbəti görüş aprelin 26-da Omanda keçiriləcək.

17:46

Romada İran və ABŞ nümayəndə heyətləri arasında dolayı məsləhətləşmələrin ikinci raundu başa çatıb.

Oxu.Az xəbər verir ki, bu barədə İran dövlət teleradioşirkətinin müxbiri məlumat paylaşıb.

Onun sözlərinə görə, məsləhətləşmələr planlaşdırıldığı kimi başa çatıb.

Müxbir qeyd edib ki, hər şey ona dəlalət edir ki, ikinci tur da konstruktiv ab-havada keçib.

17:17

İran nümayəndə heyəti namaz qılmaq üçün Omanın Romadakı səfirinin iqamətgahında ABŞ ilə danışıqların aparıldığı otağı qısa müddətə tərk edib. Fasilə ilə bağlı şayiələr doğru deyil.

Oxu.Az xəbər verir ki, bu barədə İranın dövlət teleradioşirkəti (IRİB) məlumat yayıb.

"Mətbuatda danışıqlar ətrafında çoxlu səs-küy var. İran nümayəndə heyəti namaz qılmaq üçün otağı tərk edəndə danışıqların dayandırıldığı barədə şayiələr yarandı. Danışıqların davam etdiyini əminliklə söyləmək olar", - deyə məlumatda qeyd edilib.

14:12

Romada Tehranın nüvə proqramı ətrafında böhranın nizamlanmasına həsr olunmuş ABŞ-İran danışıqların ikinci raundu başlayıb.

Bu barədə Oxu.Az İranın dövlət teleradioşirkətinə (IRIB) istinadla xəbər verir.

Məsləhətləşmələr Oman səfirinin iqamətgahında keçirilir. İran nümayəndə heyətinə ölkənin xarici işlər naziri Abbas Əraqçı, Amerika nümayəndə heyətinə isə ABŞ prezidentinin Yaxın Şərq üzrə xüsusi nümayəndəsi Stiv Uitkoff rəhbərlik edir.

11:20

İranın nüvə proqramı üzrə fikir ayrılıqlarının həlli məsələsinə dair ABŞ-İran danışıqlarının ikinci raundu Omanın Romadakı səfirinin iqamətgahında keçiriləcək.

Bu barədə Oxu.Az "Sky News Arabia" telekanalına istinadla xəbər verir.

Məlumata görə, İran və ABŞ nümayəndələri şənbə günü Romada nüvə danışıqlarının ikinci raundu üçün görüşəcəklər.

Həmçinin qeyd edilin ki, Omanın xarici işlər naziri vasitəçilik rolunu bərpa etməyi planlaşdırır.

10:44

İran nümayəndə heyəti danışıqlarda iştirak etmək üçün Romaya gəlib.

Bu barədə Oxu.Az "Azad İran" Telegram" kanalına istinadən xəbər verir.

İranın xarici işlər naziri Abbas Əraqçının başçılıq etdiyi nümayəndə heyəti Omanın vasitəçiliyi ilə İran-ABŞ danışıqlarının ikinci raundunda iştirak etmək üçün bu gün səhər İtaliyanın paytaxtı Romaya gəlib.