Hazırda İranın keçmiş müdafiə naziri Hüseyn Dehqanın rəhbərlik etdiyi "Mostazafan" Fondu Əli Laricaninin ölümündən sonra öz rəhbərlərinin İran Ali Milli Təhlükəsizlik Şurasının yeni katibi təyin olunması ilə bağlı xəbərləri təkzib edib.
Oxu.Az-ın xəbərinə görə, bu barədə "Tasnim" agentliyi məlumat verib.
"Son bir neçə saat ərzində bəzi KİV-lər Dehqanın Ali Milli Təhlükəsizlik Şurasının katibi təyin olunması ilə bağlı xəbərlər dərc ediblər, lakin bu məlumat həqiqətə uyğun deyil", - deyə fondun bəyanatında bildirilib.
Hüseyn Dehqan Əli Laricaninin yerinə İran Ali Milli Təhlükəsizlik Şurasının katibi təyin edilib.
Bu barədə "Azad İran" "Telegram" kanalı xəbər verir.
Bildirilir ki, Hüseyn Dehqan daha əvvəl müdafiə naziri vəzifəsində çalışıb, eləcə də ali liderin müdafiə sənayesi üzrə müşaviri olub.
Həmçinin Mustafa Purməhəmmədi İsmail Xatibin yerinə kəşfiyyat naziri (ETTELAAT) təyin edilib.
Qeyd edilib ki, Mustafa Purməhəmmədi təhlükəsizlik xidmətlərində, o cümlədən daxili işlər naziri, baş prokuror, ədliyyə naziri və Təhlükəsizlik Nazirliyinin xarici kəşfiyyat rəhbəri vəzifələrində çoxillik təcrübəyə malikdir.
Xatırladaq ki, İran Ali Milli Təhlükəsizlik Şurasının katibi Əli Laricani İsrailin aviazərbələri nəticəsində öldürülüb. Həmçinin ölkənin kəşfiyyat naziri Seyid İsmayıl Xatib İsrailin hücumu zamanı həyatını itirib.
