İraq iki illik fasilədən sonra Kərkük-Ceyhan boru kəməri ilə Türkiyəyə neft ixracını bərpa edib.
Oxu.Az-ın xəbərinə görə, bu barədə "Rudaw" nəşri İraq Kürdüstanı Təbii Sərvətlər Nazirliyinin bəyanatına istinadən məlumat verib.
Müvafiq razılaşma tədarükün bərpası şərtləri ilə bağlı uzun müddət davam edən danışıqlardan sonra əldə olunub. Neft ixracı sentyabrın 27-də Bakı vaxtı ilə səhər saat 7:00-da başlayıb.
"Biz ixracın bərpasına hazırlaşmışıq: Zaxu şəhərindən qərbdə 46 saylı ixrac xəttində sayğac işə salınıb, Türkiyəyə ixracın həcminə nəzarət etmək üçün mütəxəssislərimiz oradadırlar", - deyə İraqın "North Oil Company" dövlət şirkətindəki mənbə qeyd edib.
Onun sözlərinə görə, kəmərin doldurulmasına bir-iki gün vaxt lazım gələcək.
