G7 ölkələri və Avropa İttifaqı tərəfindən sərt qadağalara baxmayaraq, Rusiyadan olan almazlar dünya bazarlarında satılmaqda davam edir.
Oxu.Az bu barədə "The Moscow Times" nəşrinə istinadla xəbər verir.
Məlumata görə, Mütəşəkkil Cinayətkarlıq və Korrupsiya Hesabatı Layihəsi (OCCRP) və Avropa nəşrlərinin apardığı araşdırma göstərib ki, Moskva Ermənistanın əsas rol oynadığı dolayı sxem yaratmağa nail olub.
Qeyd olunub ki, Rusiyanın ən böyük almaz istehsalçısı və qlobal sənayenin liderlərindən biri olan "Alrosa" şirkəti Qərbin sanksiyaları altındadır. Bununla belə, o, Ermənistanın köməyi ilə öz məhsullarını Qərb bazarlarına uğurla çatdırmaqda davam edir. Bu ölkə vasitəsilə Aİ və ABŞ bazarlarına yüzmilyonlarla dollarlıq qiymətli daş-qaşlar göndərilir.
Avropa rəsmiləri etiraf edirlər ki, qiymətli daşların mənşəyi haqqında məlumat almazların cilalanması mərhələsində itir və bu, Rusiyaya onların mənbəyini gizlətməyi asanlaşdırır.
Araşdırmaya əsasən, sxemin əsas aləti 2022-ci ilin mayında Rusiyada təsis edilmiş "First Diamond Company" şirkətidir. Formal olaraq, FDC "Alrosa"dan asılı deyil, lakin onun sahibləri və top-menecerləri dövlət şirkətinə bağlıdır. 2022-ci ilin sonundan etibarən FDC Ermənistana aktiv olaraq almaz ixrac etməyə başlayıb. OCCRP-nin məlumatına görə, bu ölkəyə gətirilən daş-qaşların demək olar ki, yarısı Rusiya mənşəlidir.
Qeyd olunub ki, təkcə 2023-cü ilin yanvarından 2024-cü ilin martına qədər Ermənistandan 290 milyon dollardan çox dəyərində almaz keçirilib.
Moskva İrəvanı tranzit qovşağı kimi istifadə edərək, əsas ixracat məhsullarından biri üçün Qərb bazarlarına çıxışını qoruyub saxlaya bilib.
