"ABŞ tərəfindən Kubanın blokadaya alınması adada hakimiyyəti dəyişdirmək məqsədi daşıyan, əvvəlcədən planlaşdırılmış genişmiqyaslı iqtisadi müharibədir".
Oxu.Az xəbər verir ki, bunu Kubanın Böyük Britaniyadakı səfiri İsmara Varqas Uolter TASS-a açıqlamasında deyib:
"Vaşinqtonun Kubaya münasibətdə apardığı siyasət adi diplomatik təzyiq və ya seçmə embarqo deyil. Bu, onilliklər boyu diqqətlə hazırlanan tam iqtisadi müharibədir. Onun ideoloji kökləri ABŞ-li diplomat Lester Mellori tərəfindən 1960-cı ildə yazılmış məxfi nota ilə bağlıdır. Həmin sənəddə maddi çətinliklər yaradaraq aclıq, ümidsizlik və Kuba hökumətinin devrilməsini təhrik etmək açıq şəkildə tövsiyə olunurdu. Altmış altı il sonra bu doktrina 2026-cı ilin enerji blokadasında özünün ən sərt əksini tapdı".
Varqas Uolter ABŞ-nin atdığı addımların Kuba əhalisi üçün dağıdıcı və sistemli nəticələrindən danışıb. Onun sözlərinə görə, neft və dizel yanacağı ehtiyatlarının tam tükənməsi səbəbindən milli elektrik şəbəkəsi çöküb. Bu böhran gündə 22 saata çatan elektrik enerjisinin kəsilməsi ilə özünü göstərir ki, nəticədə xəstəxanalar, kənd təsərrüfatı, su təchizatı sistemləri və ictimai nəqliyyat iflic vəziyyətinə düşür.
