ABŞ Silahlı Qüvvələrinin Latın Amerikasındakı rəhbəri, general Frensis Donovan və Pentaqonun yüksəkvəzifəli rəsmisi Cozef Humire təhlükəsizlik üzrə danışıqlar üçün Venesuelaya gözlənilməz səfər ediblər.
Oxu.Az-ın xəbərinə görə, bu barədə "Reuters" agentliyi ABŞ rəsmilərinə istinadən məlumat verib.
Məlumata görə, bu, ötən ay ABŞ qoşunlarının hərbi əməliyyat zamanı keçmiş Venesuela lideri Nikolas Maduronu ələ keçirmələri və ona qarşı narkotik qaçaqmalçılığı ittihamlarının irəli sürüldüyü Nyu-Yorka aparmalarından bəri ABŞ hərbi nümayəndə heyətinin ölkəyə ilk səfəridir.
Venesuela hökuməti bildirib ki, ABŞ hərbi nümayəndə heyəti ölkənin müvəqqəti Prezidenti Delsi Rodriges, müdafiə naziri Vladimir Padrino və daxili işlər naziri Diosdado Kabelyo ilə görüşüb. Tərəflər narkotik qaçaqmalçılığı, terrorizm və miqrasiyaya qarşı birgə mübarizə aparmaq barədə razılığa gəliblər.
