Adolf Hitlerin şəxsi qeydlərinə aid edilən gündəlik təxminən 35 000 dollara şəxsi kolleksiyaçıya satılıb.
Oxu.Az-ın xəbərinə görə, bu barədə "Need To Know" (NTK) nəşri məlumat verib.
113 əlyazma səhifədən ibarət sənədin həqiqiliyi rəsmi olaraq təsdiqlənməyib.
Nəşrin məlumatına görə, qeydlərdə nasist xadim Herman Görinq və alman aktrisası Marlen Ditrixin adları çəkilir, həmçinin Ditrixə sevgi etirafı da daxil olmaqla, şəxsi düşüncələr də yer alır. Bəzi səhifələrdə müəllif köçmədən əvvəl Reyxskantselyariyanın vəziyyətini tənqid edir, Görinqi ad günündən sonra təsvir edir ("o, yenə də donuz kimi yeyirdi") və Ditrixi Almaniyaya qaytarmaq istəyini ifadə edir.
"Bu kitab bir çox fərziyyələr irəli sürür, lakin onun nasist lideri tərəfindən yazılmasının həqiqiliyi hələ təsdiqlənməyib. Ən azından, bir ekspert təsdiq edib ki, sənəd bu dövrə aiddir", - deyə nəşr qeyd edir.
