"Meta" mətn təsvirləri əsasında 3D modellərin süni intellekt generatorunu təqdim edib

"Meta Platforms"un tədqiqat bölməsi mətn təsviri əsasında yüksək keyfiyyətli 3D obyektlər yaratmağa imkan verən yeni generativ alqoritm, "3D Gen"i təqdim edib.

Bu barədə "Meta" "Threads" sosial şəbəkəsində məlumat verib.

Tərtibatçıların sözlərinə görə, yeni neyroşəbəkə yaradılmış modellərin keyfiyyətinə və generasiya sürətinə görə analoqlarından üstündür.

Qeyd olunub ki, bu sistem yüksək keyfiyyətli teksturaya malik 3D obyektlər yarada bilər.

Həmçinin bildirilib ki, neyroşəbəkə yaradılan obyektlərin keyfiyyətinə görə oxşar alqoritmlərdən xeyli üstündür və generasiya sürətinə görə 3-10 dəfə sürətlidir.

Məlumatlara görə, "Meta 3D Gen" bir dəqiqədən az müddətdə sadə mətn təsviri əsasında 3D obyektlər və teksturalar yarada bilir. Funksional olaraq yeni alqoritm "Midjourney" və "Adobe Firefly" kimi bəzi mövcud analoqlara bənzəyir. Bir fərq ondan ibarətdir ki, "3D Gen" fiziki cəhətdən düzgün görüntünü dəstəkləyən modellər yaradır. Bu o deməkdir ki, neyroşəbəkə tərəfindən yaradılmış modellər real həyat obyektlərinin modelləşdirilməsi və göstərilməsi üçün tətbiqlərdə istifadə oluna bilər.

Tərtibatçıların fikrincə, bu yanaşma immersiv məzmun yaratmaq üçün daha yüksək keyfiyyətli 3D generasiya imkanı verir.

Mənbə: 3dnews.ru