Fransa Prezidenti Emmanuel Makron Luvrun bir milyard avro dəyərində yenidənqurma layihəsini həyata keçirə bilməməsi səbəbindən böyük nüfuz itkiləri ilə üzləşmək riski daşıyır.
Oxu.Az xəbər verir ki, bu barədə "The New York Times" (NYT) qəzeti məlumat yayıb.
Məlumata görə, yenidənqurma layihəsinin çox baha başa gəlməsi, həmkarlar ittifaqlarının etirazları və Makronun 2027-ci ildə vəzifədən gedəcək olması riskləri artırır. "Luvr Yeni İntibah" proqramı yeni giriş və ekspozisiya dəyişikliklərini nəzərdə tutsa da, təhlükəsizlik problemləri muzeydə narahatlıq yaradıb. Fevralın 24-də muzey direktoru istefa verərək modernləşmə və təhlükəsizliyin vacibliyini vurğulayıb.
Qeyd edək ki, Luvr Makron üçün simvolik məkandır, o, 2017-ci il seçki qələbəsindən sonra çıxışını burada etmişdi və indi prezidentliyinin sonunda muzeyə yeni monumental giriş miras qoymaq istəyir.
Ekspertlər vurğulayıblar ki, yəqin ki, Makron yenidənqurmanın büdcəyə daha uyğun variantı ilə kifayətlənməli olacaq. Lakin prezident üçün yeniləmənin möhtəşəm miqyası məsələsi prinsipial əhəmiyyət daşıyır: 2027-ci ildə onun dövlət başçısı postunda qalma müddəti başa çatır.
