Qahirə Apelyasiya Məhkəməsi Misirlə Səudiyyə Ərəbistanı arasında dəniz sərhədinin demarkasiyasının qanuniliyi ilə bağlı qərardan apelyasiya şikayəti verilməsinin dayandırılması barədə qərar çıxarıb.
Oxu.Az APA-ya istinadən verdiyi məlumata görə, bununla da Misir və Səudiyyə Ərəbistanı arasında müqavilə legitim sayılıb.
Qeyd edək ki, iki gün əvvəl dəniz sərhədinin demarkasiyası ilə bağlı Misir hökuməti Ər-Riyadla imzalanmış müqaviləni bəyənib və təsdiq edilməsi üçün parlamentə göndərib.
Xatırladaq ki, bu il aprelin əvvəlində Misir və Səudiyyə Ərəbistanı iki dövlət arasında dəniz sərhədlərinin demarkasiyası ilə bağlı müqavilə imzalayıb. Bu müqaviləyə əsasən, Qırmızı dənizdə Misirin idarəetməsində olan mübahisəli Tiran və Sanafir adaları Ər-Riyadın yurisdiksiyasına keçib. Hər iki ölkənin hakimiyyəti bəyan edib ki, bu adaların Səudiyyə Ərəbistanına məxsus olub, 1950-ci ildə Ər-Riyadın xahişi ilə Misirin yurisdiksiyasına keçib. Ancaq Misirin könüllü olaraq Qırmızı dənizdəki Akaba körfəzinin çıxışında, Şarm-əş-Şeyx şəhərin yaxınlığındakı strateji rayonda yerləşən bu adalardan imtina etməsi Misirdə narazılığa yol açıb. Bununla bağlı etiraz xarakterli aksiyalar keçirilib, müqavilənin ləğvi ilə bağlı məhkəmələrə müraciətlər olub.
