Dağıdıcı daşqınlardan sonra Nepalın bərpası üçün beynəlxalq ictimaiyyətin dəstəyinə ehtiyac duyulacaq.
Oxu.Az xəbər verir ki, bu barədə ölkənin Xarici İşlər Nazirliyi (XİN) məlumat yayıb.
"Daşqınların vurduğu ziyan çox böyükdür. Hazırda ehtiyacların ilkin qiymətləndirilməsi həyata keçirilir. Evlər, yollar, körpülər və su-elektrik stansiyaları kimi mühüm infrastrukturun bərpası və yenidən qurulmasının real miqyasını müəyyənləşdirmək məqsədilə təbii fəlakətdən sonrakı vəziyyətin daha ətraflı təhlili aparılacaq.
Bərpa və yenidənqurma prosesi üçün beynəlxalq yardıma ehtiyacımız olacağını gözləyirik. Qiymətləndirmə işləri yekunlaşdıqca, konkret tələbatlarımız barədə daha sonra məlumat verəcəyik", - deyə nazirlikdən bildirilib.
XİN bu çətin dövrdə həmrəylik, xeyirxahlıq və səxavətli dəstək təkliflərinə görə Nepalın dostlarına və tərəfdaşlarına dərin minnətdarlığını bildirib.
"Biz artıq Hindistan, Çin, BƏƏ və digər dövlətlərdən humanitar yardım qəbul etmişik. BƏƏ, Myanma, ABŞ, Qətər, Böyük Britaniya, Avstraliya, Cənubi Koreya, Yaponiya, Yeni Zelandiya, Malayziya, Sinqapur, Banqladeş, Pakistan kimi dost ölkələrdən, o cümlədən BMT, ÜST, UNICEF kimi beynəlxalq təşkilatlardan əlavə yardımlar gəlməkdədir", - deyə nazirliyin açıqlamasında vurğulanıb.
Qeyd edək ki, daha əvvəl Nepal hökumətinin daşqınlardan sonra bir neçə dövlətin axtarış-xilasetmə qrupları göndərmək təklifini qəbul etmədiyi barədə məlumat yayılmışdı.
Xatırladaq ki, hadisə avqustun 26-da səhər saatlarında Nepalın şimal bölgəsində baş verib. Son məlumatlara əsasən, hadisə nəticəsində 919 nəfər həyatını itirib. 4 mindən çox insan isə itkin düşmüş hesab olunur.
