Niger Fransa və Ukraynanı Saheldə terrorçuluğa dəstək verməkdə ittiham edib.
Oxu.Az TASS-a istinadən xəbər verir ki, Nigerin Baş naziri Əli Lamin Zeyn bununla bağlı ciddi sübutların olduğunu bildirib.
"Hazırda Saheldə baş verənlər silahlı üsyan deyil, dini müharibə deyil. Bölgəmizdə terrorçuluq təbii sərvətlərimizin istismarı naminə yeni müstəmləkəçiliyə cəhdin həyasız formasıdır. Nigerin uranı, Malinin və Burkina-Fasonun qızılı, litiumumuz, qazımız və neftimiz keçmiş müstəmləkə metropoliyasına rahatlıq vermir. Bizi özümüzü idarə etmək, düşünmək, istehsal etmək və özümüzü müdafiə etmək iqtidarında olmadığımıza inandırmaq istəyirlər. Emmanuel Makronun Fransası öz əlaltıları vasitəsilə Ukrayna ilə birlikdə Saheldə məkrli əməliyyat həyata keçirir. Bu faktlar yaxşı sənədləşdirilib", - deyə "La Nouvelle Tribune" portalı onun sözlərindən sitat gətirib.
İyulun 27-də Niger Prezidenti Abdurrəhman Tçiani Fransa və Avropa İttifaqının Saheldə silahlı qruplaşmaları maliyyələşdirdiyini bildirib. Onun sözlərinə görə, söhbət, xüsusilə, özünü "Əl-Qaidə"nin tərkib hissəsi hesab edən "Camaat Nüsrət əl-İslam vəl-Müslimin" qruplaşmasından gedir.
