Paris ətrafındakı Sena və Marna departamentinin ərazisində cinayətkarlar Türkiyənin logistika şirkətinə məxsus yük avtomobilini qarət edərək qoşqudan ümumi dəyəri təxminən 18 min avro olan 86 kondisioner oğurlayıblar.
Oxu.Az xəbər verir ki, bu barədə "Le Figaro" qəzeti hüquq-mühafizə orqanlarındakı mənbələrə istinadən məlumat yayıb.
"Cinayət törədilən zaman iki sürücü yük maşınının yanında yatmışdı. Onlardan heç biri cinayətkarların kondisionerlərlə dolu qoşqunu qismən necə boşaltdığını eşitməyib", - deyə məlumatda bildirilir.
Ümumilikdə yük maşını 440-dan çox cihaz daşıyıb. Oğurluq yalnız səhərə yaxın aşkar edilib və bundan sonra sürücülər polisə müraciət ediblər.
Axtarış işləri dayanacaq ərazisində şahidlərin və videomüşahidə kameralarının olmaması səbəbindən çətinləşir.
Cinayət Cənubi və Qərbi Avropada davam edən anomal istilər fonunda baş verib. Yüksək temperatur iqlim avadanlıqlarına tələbatı artırıb, bəzi ərazilərdə ciddi qıtlığa və hətta mağazalarda qarşıdurmalara səbəb olub.
