"Pentaqonun rəhbəri Pit Heqset ABŞ Hərbi Dəniz Qüvvələrinin səkkiz kapitanının, o cümlədən iki qadın və iki qaradərili zabitin rütbəsinin artırılmasının qarşısını alıb. Bununla yanaşı, o, bir neçə admiralın daha yüksək hərbi rütbə almasına da mane olmağa çalışır. Nəticə etibarilə, onların planlaşdırılan vəzifəyə yüksəlməsi bir neçə ay müddətinə gecikib".
Oxu.Az xəbər verir ki, bu məlumatı "The Wall Street Journal" (WSJ) Pentaqondakı mənbələrə istinadən yayıb.
Nəşrin yazdığına görə, Pit Heqset eyni zamanda əvvəllər rütbəsinin artırılmasından dəfələrlə imtina edilmiş ən azı bir yaxın silahdaşının vəzifəyə yüksəlməsi üçün cəhdlər göstərir. Qəzet vurğulayır ki, ABŞ Hərb Nazirliyində və Konqresdə Heqsetin öz siyasi baxışlarını bölüşən sadiq zabitləri yüksək vəzifələrə təyin etməsi ilə bağlı narahatlıqlar artmaqdadır.
WSJ-nin mənbələrinin dediyinə əsasən, Heqset hesab edir ki, əvvəlki administrasiya müxtəlifliyin təmin edilməsi üzrə kvotaları doldurmaq məqsədilə bəzi hərbi qulluqçuların rütbəsini əsassız yerə artırıb və digər ixtisaslı namizədləri nəzərdən qaçırıb.
Pentaqonun mətbuat katibi Şon Parnell bildirib ki, orduda rütbə yalnız ona layiq olanlara verilir və nazirlik rütbə artımı zamanı hərbçinin dəri rəngini və ya cinsini hər hansı bir amil kimi nəzərə almayacaq.
